Sortzen elkarteak «euskal eskola publikorantz urratsak ematen hasi zenetik mende laurden» pasa da, ostegunean Oialume Zar sagardotegian egindako ekitaldian azaldu zutenaren arabera.
Hori horrela, EskolHarria, biharko herria jaialdia egingo da Hernanin, maiatzaren 22an. «Nahi eta behar dugun eskola publiko hori irudikatuko eta aldarrikatuko dugu».
Lau gune, hainbat eragilek antolatuta
Jaialdiaren egunerako, lau gune antolatu dira: plazan EskolHarria, euskal curriculumaren gunea; Plaza Berrin GiltzHarria, ikasle euskaldun eleaniztunena; Tilosetan Harrikoxkorrak, hezkidetza eta haurren gunea; eta Atsegindegin GazteHarria, gazteen gunea. Horietan, denetik izango da 10:30etatik 14:00etara: hitzaldiak, tailerrak, kale animazioa, musika, Irrien Lagunak, ipuin kontaketa, materiala salgai...
Hau guztia antolatzeko, babesa erakutsi diote ekimenari Astigarragako Herri Eskola, Martuteneko Arantzazuko Ama, Aitor ikastola eta Langile ikastolako guraso eta irakasleek; Hernaniko Udalak; Astigarragako eta Hernaniko Gazte Asanbladek; Harituz elkarteak; Hernaniko sagardogileek; CD Hernaniko pelota elkarteak; Barry Manley antzerkilariak...
EskolHarria abestia
Horrez gain, EskolHarria kantua ere aurkeztu zuten; Unai Agirrek egin du letra, eta Xabier Solanok eta Laiotz taldeak musika. Ainhitze Kalonjek, berriz, Harriren papera egin du.
Pelota partiduak, aurretik
Jaialdi honen aurretik, ordea, motorrak berotzeko hainbat hitzaldi izan dira, eta maiatzaren 7an beste ekitaldi bat antolatu da: lau pelota partidu jokatuko dira, 17:00etan Hernaniko frontoian, 3 eurotan.