«75 urte. [...] seguru nago kluba sortu zutenek gu ikusiko bagintuzte, pozik jarriko zirela, ikusita beraiek hasitakoarekin hemen jarraitzen dugula». Kluba sortu zutenak gogoratuz hasi zuen Martxelo Ezponda lehendakariak CD Hernaniren 75garren urteurreneko aurkezpen ekitaldia.
Baina larunbatekoa hasiera besterik ez zen izan, 75 urte ez dira egunero betetzen, eta hori ospatzeko, egitarau berezia aurkeztu zuten herenegun.
Ospakizun garrantzitsua da herriko kirolarentzat, eta hori irudikatzeko, bertan egon ziren, Ezponda lehendakariarekin batera, gaur egun CD Hernaniren zutabeetako batzuk, hala nola pelota saileko Rufino Rekalde eta Garbiñe Tijero, futboleko Andrea Isasa eta atletismoko Idoia Esnaola. Udaleko Esti Aldeiturriaga kiroletako zinegotzia ere bertan egon zen Udalaren babesa adierazteko.
Realeko jokalariak Zubipen, bihar
Urteurrenaren bueltan ekintza mordoa antolatu ditu CD Hernanik maiatzean zehar. Bihar izango da aurrenekoa, eta ez dira nolanahi hasiko: Realeko jokalariek Zubipen egingo dute asteko lehenengo entrenamendua. Goizeko 11:00etatik aurrera, Zubipeko ateak herritarrei irekita egongo dira, Realeko futbolariak ikusi ahal izateko.
Hitzaldiak, txapelketak eta jardunaldiak
Entrenamendu berezi honekin hasiko den arren, CD Hernaniko kirol atal guztien lanarekin osatutako egitarauak, ekintza ugari ditu: futbol partidu bereziak, eskola kirolako haurrentzat jardunaldiak, hitzaldi tekniko irekiak...
CD Hernanik herritarrei eskaini nahi dien egitaraua da. Eta hala azaldu zuen Ezponda lehendakariak larunbateko aurkezpenean: «gure helburua ez da haztea, kirolarekin gozatzen jarraitzeko aukera eskaintzea, poz asko hartzea eta hernaniarrak gure lanarekin harro egotea baizik».
Argazki erakusketa, tabernetan
Egitaraueko ekintzez gain, argazki erakusketa antolatu du CD Hernanik. Maiatzean zehar, herriko zenbait tabernetan CD Hernaniren argazkiak ikusi ahal izango dira. Argazki horiek laburbiltzen dute 75 urte hauetan kirol taldeak egin duen lana.
Ikurra, Luis Telleriarena
Larunbateko aurkezpenean, Luis Telleriaren laguntza bereziki aipatu nahi izan zuen Martxelo Ezponda lehendakariak, klubaren izenean. Alde batetik, ikurraren diseinua egin duelako. Eta bestetik, artista haundia izateaz gain, Hernaniko kirolean instituzio bat delako.
EGITARAUA
Maiatzak 3, 11:00etan: Realaren entrenamendua Zubipen.
Maiatzak 7, 10:00etan: Eskola Kiroleko jardunaldia Ave Maria parkean.
Maiatzak 15, 11:30etan: Tilosetako frontoian esku pelota eta palako partiduak.
Maiatzak 19, 19:30etan: Mahai-ingurua: Naroa Agirre, Abel Barriola eta Aitor Lopez Rekarte. Biterin.
Maiatzak 21, 11:00etan: futbol partidua: Emakumezkoen Euskal Liga - Reala.
Maiatzak 21, 11:00etan: Atletismo txapelketa: Meeting 75garren urteurrena.
Maiatzak 22: Jubenilen futbol txapelketa Zubipen: CD Hernani, Real Sociedad, Osasuna eta Real Zaragoza.
Maiatzak 26, 19:30etan: Hitzaldi teknikoa. Moderatzailea: Jon Escudero. Udaletxean.
Maiatzak 27, 19:00etan: Jokoz kanpo antzerkia. Biterin. Antolatzaileak: Real Sociedad Fundazioa eta CD Hernani.
Maiatzak 29, 09:00etan: Futbol eskolako jardunaldi berezia, Zubipen.
Maiatzak 29, 11:00etan: Berria esku pelota txapelketako kanporaketa.