Majo sufrituta batzuk eta nagusitasunez besteak, Sagardo Txapelketaren finalean dira Uterga eta Aizpuru III, batetik, eta Segurola eta Endika, bestetik. Horrela, beraz, Bereziartua eta Petritegi sagardotegiak ariko dira finalean, hurrenez hurren. Larunbat honetan izango da hori, 16:00etan Galarretan.
Ezin emozio haundiagoa, aurreneko semifinalean
Herenegun jokatu ziren bi semifinalak, baina oso desberdinak izan ziren biak. Aurrenekoan, faborito ziren Uterga eta Aizpuru III, baina gauzak oso zail jarri zizkieten Ezkurra IIk eta Larrañagak. Faboritoek tarte txiki bat ireki zuten hasieratik, 4-5 tantokoa, baina bukaera aldera etorri zitzaizkien gainera, 39na berdintzeraino, Ezkurra IIren partidu bikainarekin. Eta sorpresa emateko zorian egon ziren, baina txapa behera egin zion ihes pelotak, Larrañagari (40-39).
Bigarrenean, ezustekoa
Ezustekoa ematea lortu zutenak, Segurola eta Endika izan ziren, bigarren semifinalean. Urriza jokoz kanpo utzi eta Labakari atzean lan haundia emanda, alde haundiarekin nagusitu ziren (40-25).