Munduko hamaika txokotara bidaiatuko du gaur, hernaniarren dastamenak. Beste urte batez, 2004an hasi zutenetik, jaialdi gastronomikoa antolatu du AMHER elkarteak, eta 21 herrialdetako jakiak dastatzeko aukera izango da bertan.
Plaza Berrin jarriko dituzte postuak, eguerdiko 12:00etatik aurrera; eguraldi txarra egiten badu, berriz, Atsegindegiko estalpera mugituko dituzte.
Kutixi gazi-gozoak, aukeran
Mota guztietako kutixi gaziak eta gozoak izango dituzte aukeran, bertaratzen direnek.
Horrela, Argentinako pastaflora, matea edo esne-gozoak eskainiko dituzte; Boliviako txarkea; Honduraseko nakatamala; Errusiako txeburekia; Cachemirako pakorak; Uzbekistango plofa (paella tipikoa); Irlandako artzai pastelak; Txileko piñu enpanadak...
Eta gainera, nahi dutenek, errezetak lortzeko aukera ere izango dute bertan.
Haurrentzako tailerra, Santa Barbara elkartean
Haur eta gaztetxoentzat, berriz, tailerra emango dute Santa Barbara elkartean, Iturriaga kalean, 10:00etan. Ogi arabiarra eta roskillak egiten ikasiko dute bertan. Guztiei luzatu diete gonbitea, bertaratzeko.