Bere poza azaleratu nahi izan du Hernaniko PSE-EEk, «beste herri batzuetan hondakin bilketa sistema bozkatu dutelako». Eta nabarmendu nahi izan du, aurreko igandean Astigarragan izan zen «emaitza haundia», non 2.769 lagunek eman zuten botoa; horietako 1.640 edukiontzien sistemaren alde, eta 1.109 atez atekoaren alde.
Horregatik, astigartarrak zoriondu nahi dituzte Hernaniko sozialistek, «demokrazia partehartzailearen demostrazio horrengatik; gure herrian Bilduk onartzen ez duena. Guk pasa den urrian eskatu genion Udalari, horrelako kontsulta bat egitea, elkarlanean aritzeko prest azalduta. Baina Gobernu Taldeko alderdiek ez zuten babestu: EH Bildu kontra azaldu zen, eta Orain Hernani abstenitu», gogorarazi du PSE-EEk.
«Borondate politikoa da traba bakarra, herritarrei galdetu ahal izateko»
Edozein kasutan, bozketa egin dadin eskatzen jarraituko dutela nabarmendu dute, «herritarrei hitza emateko».
Ricardo Crespo bozeramaileak, gaineratu du: «nahiko genuke Hernani izatea, berandu baino lehen, herritarrei hondakinen bilketari buruz galdetuko dien herrietako bat; Usurbil, Bergara, Eskoriatza, Aretxabaleta, Legazpi, Ordizia eta Astigarraga bezala. Horietan erakutsi dute, borondate politikoa dela traba bakarra, herritarrei galdetu ahal izateko».