Azkenaurreko partidua, azkenaurreko aukera du Hernanik, datorren urtean Ohorezko Mailan jokatzeko pausu garrantzitsua emateko. Ordizia izango dute aurkari trikoloreek, talde aski ezaguna. Arratsaldeko 16:30etan, Altamiran.
Partidu berezia izaten da urtero Ordiziaren kontrakoa, derbi kutsua izaten duelako. Baina azkenekoetan, bereziaz gain garrantzitsua ere ari da izaten. Izan ere, joan den urtean klabea izan zen Hernani salbatzeko; eta aurten ere, hala izango da.
Arnasa, azken garaipenak
Hernani hamargarren dijoa sailkapen nagusian, momentuz, salbazioa ematen dion postuan. Orain bi aste etxean Alcobendasen kontra jokatutako partidua klabea izan zen, arnasa hartzeko. Gainera, VRACek irabazi egin zuen Gernikaren kontra, eta porrotak salbaziorako lehian sartu zuen berriz ere talde bizkaitarra. Gernika azkenaurreko postuan dijoa orain, eta puntutan Hernanirekin berdinduta dago, 28na. Azken postuan berriz, Pozuelo dijoa, 26rekin. Talde madrildarrak ezustekoa eman zuen joan den astean, Santboianaren kontra irabazita. Beraz, lehia bizi-bizia dute sailkapeneko azken postuetan. Liga orain bukatuko balitz, Hernanik lortuko luke salbazioa; Gernikak Play Offa jokatuko luke; eta Pozuelo mailaz jaitsiko litzateke.
Zaleen babesa
Gaurko partiduan, hernaniarren babesa behar-beharrezkoa izango dute trikoloreek. Balkoietarako banderolak ere jarri dituzte salgai, 10 euroan: Txili, Zintzarri, Oindi, Kixkal, Tripontzi eta Landaren. yy