Igandean jokatu zen, Eibarren, Gipuzkoako Eskolarteko Bertsolari Txapelketa, 15 eta 18 urte artekoena, eta bertan izan ziren Hernaniko Bertso Eskolako zortzi gazte. Baita maila bikaina eman ere! Finalerako sailkatu ziren Beñat eta Andoni Mujika lehengusuak, eta biak maila ederrean aritu ondoren, aurrenekoak jantzi zuen txapela, idatzizko saria eta bat-batekoa irabazita.
Horrela, Euskal Herriko eskolarteko finala jokatzeko sailkatu da Beñat Mujika. Ereñotzun izango da hori, ekainaren 4an.
Bertso Eskolen Eguna
ospatzeko aukera ere bai, igandean bertan
Txapelketarako bakarrik ez, ospakizunerako eguna ere izan zen igandekoa, Eibarren. Izan ere, Bertso Eskolen Eguna ere ospatu zuten bertan. Giro ederrean pasa zuten eguna, elkarrekin bazkaldu zuten, eta jolasak ere egin zituzten.
Bertso Eskolako zortzi gazte aritu ziren, eta finalerako sailkatu ziren Beñat eta Andoni Mujika.
Hernani finalista, Pernando Amezketarra sariketan
Bestalde, ostiralean jokatu zen Pernando Amezketarra sariketako bigarren semifinala, Berastegiko gaztetxean, eta Hernani nagusitu egin zitzaion Goierriri.
Horrela, apirilaren 30eko finalera sailkatu da, Eli Pagolak, Oier Iurramendik eta Arnaitz Lasartek osatutako hirukotea. Amezketan izango da saioa, Behartzana jatetxean.