Lehenbailehen jarri nahi du martxan EAJk edukiontzien sistema, hala jakinarazi dute Kronikara bidalitako prentsa oharrean. Azaldu dutenez, legealdiko helburu nagusietako bat zen kontsulta egitea: «hauteskunde kanpainan hitz eman bezala, EAJren helburu nagusietako bat zen hondakin bilketa sistemari buruzko kontsulta egitea».
«Gainontzeko kontsultekin alderatuz, Astigarraga parte hartze gehien izan duen herrien artean dago»
Galdeketa atzean utzi, eta eskerrak emateko ere, baliatu dute prentsa oharra: «alderdi jeltzaletik eskerrak eman nahi dizkiegu igandean gerturatu ziren guztiei. Gipuzkoan hondakinen inguruan izan diren gainontzeko kontsultekin konparatuz, Astigarragakoa parte hartzaile gehien izan dituenen artean dago; izan ere, hautesle erroldaren %60ak eman zuen botoa». Partehartze kopurak Udal gobernuak aurretik zuen sentsazioa balioztatzen du: «Astigarragak erabakitzeko gogoa zuen. Ildo honetik, prozesu osoan zehar gaia despolitizatu nahi izan dugu».
«Sentitzen dugu EH Bilduk hausnarketa bera egin ez izana»
Oharrean azaldu dutenez, sentitzen dute EH Bilduk hausnarketa bera egin ez izana: «ez duela hiru urte, ezta ere orain. Kontsulta egitea onartu arren, EH Bilduk hartutako konpromisoari huts egin dio, gezurrez betetako kanpaina desleiala eginez. Ez dator bat EAJk prozesu osoan sustatu nahi izan duen lan eta akordio giroarekin».
Udal gobernuak herritarrak entzuteko bidea hartu dutela dio, prentsa oharrean: «ez dugu bilketa sistema aldatu Alkatetzara iristean, EH Bilduk egin zuen bezala. Gainera, EH Bilduk indarrean jarritako Parte Hartze Ordenantzak eskatzen dituen pausu guztiak jarraitu ditugu, nahiz eta honek prozesua luzatu duen».
Igandekoa egun aberasgarria izan zela gaineratu dute: «familia asko gerturatu ziren, gurasoak seme-alabekin... Astigarragan egin den aurreneko kontsultak irudi ederra utziko du oroimenean». Azkenik, emaitzei erreparatuz, EAJk dio, 1640 astigartarrek, %60ak edukiontzien sistema aukeratu duela: «lanean hasiko gara edukiontziak uda baino lehen ezartzeko».