Saldo positiboarekin likidatu du Hernaniko Udalak, 2015eko Udal Aurrekontua. Diru-sarrerak zein gastuak, biak haunditu ziren joan den urtean, eta 3.628.000 euroko gerakina utzi du ekitaldiak. Hortik zati bat, 2.537.000 euro, aurtengo aurrekontuan txertatuko ditu Udalak, eta aprobetxatuko du, partida batzuk indartzeko eta ekimen berriak martxan jartzeko.
Diru-sarrerak arruntak, 2014an baino %7 gehiago
Gerakinaren arrazoia, diru-sarrera arrunten haunditzea izan da: «2015eko tasak eta zergak bere horretan mantendu genituen arren, diru-sarrera arruntak %7 areagotu ziren 2014koen aldean», azaldu zuten Luis Intxauspe alkateak eta Isa Sanchez ogasun zinegotziak.
Hiru sarrera haunditu ziren bereziki: Foru Aldundiak emandako dirulaguntza; kobratu gabe zeuden zergen likidazioa; eta birziklapenagatik eta ikastaroetatik, besteak beste, lortutako diru-sarrerak.
Gerakinaren zati haundi bat inbertitu egingo du aurten, eta gainerakoa gorde, ezustekoetarako.
Inbertsioetan, %60 gehiago
Gastuak, berriz, %3,2 haunditu ziren, 2014aren aldean, eta nabarmen igo zen kopurua, inbertsioetan: %60 gehiago inbertitu zuen Udalak, 2014an baino.
2015erako aurreikusita zeuden hainbat inbertsio, berriz, aurten exekutatuko ditu Udalak, eta zuzenean erantsiko dizkio partida horiek aurrekontuari, 3.763.000 euroko kopuruaz: Urumea ikastolako jolastokiaren zati bat estaltzea, Langile ikastolako jangela haunditzea, Sagastialdeko haur parkea estaltzea...
Baina horretaz aparte, likidazioa eginda, 3.628.000 euroko gerakina dago, eta horren zati bat ere sartuko du aurtengo aurrekontuan. Eta zehaztu du, dagoeneko, zertan erabiliko dituen 2.537.000 euro horiek.
Milioi bat euro, aurreikusi gabeko beharretarako
Gerakinaren beste milioi euro inguru, gorde egingo du Udalak, «aurten aurreikusita ez dagoen edozein gertaera edo beharrei aurre egiteko». Izan ere, aldaketak egon daitezke Foru Aldundiaren ekarpenean, eta baita Espainiari ematen zaion kupoan ere. Udal kontuen auditoria bat ere eskatuko du, «gardentasunaren aldeko apustuari eutsiz».
Zertan inbertituko dira 2.537.000 euro?
- Kiroldegiko energia sistema, segurtasuna eta irisgarritasuna hobetzeko lanak: 972.000 euro
- Landare poligonoko errepidea haunditzea, autobusen eta kamioien zirkulazioa hobetu eta egun Karabeletik igarotzen den trafikoa murrizteko: 400.000 euro
- Gipuzkoako Hondakinen Kontsorzioak, hondakinei ezarri dien tarifen igoerak (%92 organikoari eta %20 errefuxari) dakarren gastuaren areagotzeari aurre egitea: 150.000 euro
- Udal egoitzetan eta eraikinetan hobekuntzak egitea, energiaren gastua murrizteko (leihoak, fatxadak...): 184.000 euro
- Karabel eta Ibaiondo poligonoa lotuko dituen bidegorria egitea: 90.000 euro
- Larregaingo zabortegia itxi, zigilatu eta ingurunea berreskuratzeko proiektua abiatzea. Foru Aldundiarekin elkarlanean, bi fasetan egingo da: 31.000 euro
- Negu planaren bigarren fasea, errepide eta bideetan izotz plakak sortzea saihesteko: 60.000 euro
- Kultura, berdintasuna, hezkuntza eta euskera arloetan ekimen berriak: 38.739 euro
- Itzulpen zerbitzua erostea: 9.000 euro
- Herriko merkataritza biziberritzeko plana eguneratu eta garatzeko partidak bideratzea: 25.000 euro
- Lizeaga auzoa biziberritzeko proiektua: 24.500 euro
- Estolderia hobetzea: 85.000 euro
- Elorrabiko zubia eraikitzea (Confederación Hidrográfica del Nortek proiektu berria onartzeko zain): 10.000 euro