Donostia 2016 ekimenen bueltan antolatu da Emusik jaialdia; maiatzaren 5etik 8ra bitartean, Europa osoko musika eskoletako orkestra, banda, abesbatza, dantza talde eta bestelako musikariak elkartzea da asmoa.
Hernaniarrek ere hartuko dute parte topaketa haundi horretan. Era berean, Hernanin ere hainbat kontzertu emango dira.
8.500 ikasle, elkarrekin
Jaialdia maiatzaren 5etik 8ra egingo da. Donostian, eta inguruko herrietan hainbat kontzertu emango dituzte Europa osotik etorritako milaka musika ikaslek.
Baina inaugurazio kontzertu nagusia Donostian izango da, maiatzaren 6an, 11:00etan. ‘Hernani’ Musika Eskola Publikoko hainbat ikaslek ere bertan hartuko dute parte, Europako 8.500 ikaslerekin batean.
Joan den astean izan ziren Nordhorn musika eskolako bi irakasle, Hernaniko Musika Eskolan.
Alemaniarrak Hernanin, aurreko egunean
Inaugurazio nagusia baino lehen eta ondoren, kontzertu gehiago izango dira. Horietako bat, gutxienez, Hernanin.
Maiatzaren 5ean, jaialdi nagusiaren aurreko kontzertua izango da Hernanin; Alemaniako Nordhorn Musika Eskolako Connexion Ensemble taldeak joko du.
Hain zuzen, joan den astean herria eta Musika Eskola ezagutzen izan ziren, hango bi irakasle, eta Hernasax saxofoi taldea, akordeoi orkestra eta abesbatza entzuteko aukera izan zuten.