ASTIGARTARREK hondakin sistema aukeratzeko botoa eman zuten atzo. Edukiontzi sistemaren alde egin zuen herritarren gehiengoak, botoen %59,23arekin (1.640 herritar); atez atekoaren alde %40,05ak (1.109 herritar). Boto txuriak hiru izan ziren; eta baliogabeak 17.
4.692 herritar zeuden botoa ematera deituta atzo, eta 2.769 gerturatu ziren udaletxera, aukeraketa egitera; %59,02a.
«Bi hilabeteko epean saiatuko gara
martxan jartzen»
2013ko apirilean jarri zen martxan atez atekoa Astigarragan. Atzoko emaitzen ostean, Udalak azaldu zuenez, 2 hilabeteko epean jarri nahi dute edukiontzi sistema martxan: «ahalegina egingo dugu ahalik eta azkarren jartzeko. Bi hilabeteko epea kalkulatzen dugu».
Hemendik aurrera eman beharreko pausuak bi direla azpimarratu zuten: «batetik, bilketa egingo duen enpresa zein izango den zehaztu behar da. Garbitaniari egin zaio eskaintza; eta besteei ere egingo zaie. Bestetik, orain arte hondakinak biltzen aritu diren langileak mantendu nahi dira; eta bide horretan egingo dugu lana».
Alderdien balorazioa
Emaitzak jakin ostean, Kronikak Udalean ordezkaritza duten hiru alderdiei eskatu zien balorazioa egiteko. Segidan, hiruen iritziak: EAJ eta PSE-EErenak lehendabizi, edukiontzi sistemaren alde daudelako; eta EH Bildurena ostean, atez atekoarekin aldekoak direlako.
Jesus Mari Santos, EAJ: «Herritarrei hitza eman diegu eta pozik gaude egin duten hautuarekin»
Balorazioa egiteko eskatuta, egun polita izan zela azpimarratu zuen Jesus Mari Santosek atzo; Alkatea eta EAJko bozeramailea da Santos: «egun oso polita izan da. Azkenean lortu dugu guk nahi genuena, jendeari hitza ematea. Hauteskunde kanpainan hala esan genuen, herritarrei hitza emango geniela eta bozketa hau egingo genuela. Emaitzak oso onak dira, botoa ematera %60a etorri baita».
Pozik azaldu zen, herritarrek edukiontzi sistema aukeratu zutelako: «era berean, pozik gaude herritarren hautuarekin. Guk bosgarren edukiontzia nahi genuen, eta lortu egin dugu».
Azkenik, datozen pausuetaz hitz egin zuen Santosek: «Orain lantzen hasi beharko da bosgarren edukiontziaren sistema martxan jartzeko prozesua. Hurrengo pausua da, bilketa egiten duten enpresekin hitz egitea. Garbitania eta San Markosekin hitz egingo da, beraiek baitira hemengo bilketa egiten duten bi enpresak».
Mikel Duran, PSE-EE: «Bosgarren edukiontziaren sistema ahalik eta azkarren jarri behar da martxan»
Herritarren partehartzea nabarmendu zuen Mikel Duranek, PSE-EEko bozeramaileak, balorazio hasieran: «Hasteko astigartarrak zoriondu nahi ditut parte hartu izanagatik. Ia 2.800 lagunek hartu dute parte, erroldaren %59,02ak».
Emaitza argia izan dela gaineratu zuen: «Emaitza argia da; herritarren %59,23ak bosgarren edukiontzia aukeratu du; eta egungo sistemaren alde, atez atekoaren alde, %40,05ak egin du».
Azkenik, azaldu zuen hemendik aurrera guztiek traineru berean egin behar dutela arraun: «Hemendik aurrera guztiok zentzu berean egin behar dugu lana. Bosgarren edukiontziaren sistema ahalik eta azkarren jarri behar da martxan; traineru berean egin behar dugu arraun, emaitzak argiak baitira.
Eguna eredugarria izan zela azpimarratu zuen Duranek: «Bukatzeko, azpimarratu nahiko nuke gaurko eguna eredugarria izan dela; eredugarria izan den moduan zortzi hilabete hauetan prozesua diseinatzeko egin den lana».
Andoni Gartzia, EH Bildu: «Lanean jarraituko dugu %80eko birziklatze tasatik
ez jaisteko»
Andoni Gartziak, EH Bilduko bozeramaileak, herritarrak zorionduz hasi zuen balorazioa: «zorionak eman nahi dizkiet herritarrei gerturatu direlako. Parte hartze nahiko altua izan da. Eskerrak gure aukera babestu duten herritar guztiei eta kanpaina honetan laguntzen aritu diren herritar ezberdinei: Garbitaniako langileei batik bat, EH Bilduko kideei eta herritarrei».
Emaitzari dagokionean, balorazio positiboa egin zuen EH Bilduko bozeramaileak: «eta emaitzen inguruan esan, balorazio positiboa egiten dugula. Gure asmoa, hasieratik, atez atekoa tresna gisa erabiltzea izan da, birziklatze emaitzak lortzeko. Orain sistema aldatuko da herritarrek hala erabaki dutelako, eta gure asmoa hasierako berdina izango da: %80an mantentzea birziklatze tasa. Guk atez atekoarekin lortu dugu hori, eta orain bosgarren edukiontziarekin edo beste sistema batekin lortzen bada, ongi etorria izango da».
Azkenik, hemendik aurreraro erronkak ere, azaldu zituen Gartziak: «gure lana eta erronka izango da, sistema diseinatzea, oraindik ez baitago erabat diseinatua; eta bestetik, lan egitea portzentaje horiek ez jaisteko». yy