Baja askorekin gerturatu ziren Mundarroko mutilak larunbatean Trintxerpeko zelaira: lesioak, kanporatzeak, gaixotasunak... Sanpedrotarra liderra zuten aurkari, eta bazekiten ez zela neurketa erraza izango. Azkenean ordea, moreek lortu zuten ondo egindako lanaren saria: 2-2ko berdinketa.
Borroka, deskontura arte
Bi jubenilekin jokatu zuen partidua Mundarroak. Ez zen nahi bezain ondo hasi, aurreneko jokaldian, zoritxarrez, Markelek bere atean gola sartu baitzuen. Sanpedrotarrak taldeak igoera du helburu, eta sutsu zelairatu ziren. Mundarro saiatu zen izandako aukerak baliatzen, baina atsedenaldirako gutxi falta zela, 2-0 aurreratu zen etxeko taldea, areaz kanpotik egindako jaurtiketa batean.
Atsedenalditik bueltan, presioa aldagelan utzi, eta gora egin zuen Mundarrok. Abisu pare baten ostean, Gartzi kapitainak distantzia txikitu zuen markagailuan: faltaz sartu zuen gola, beraien defentsak lagunduta.
Sanpedrotarrak taldeak asko zuen jokoan, eta defentsan babesteko joera hartu zuten. Mundarrok baloi horiek aprobetxatu, eta deskontuan lortu zuen ondo egindako lanaren saria: berdinketaren gola. Markelek buruz egindako gol bati esker, puntu ederra lortu zuten moreek. Asteburuan Urnietaren bisita jasoko dute Zarkumendegin.