Protagonismo haundia Telmo Semperenak, onenen artean

Ahazteko moduko asteburua izango zen aurrekoa txirrindulari astigartarrentzat, Tel­mo Semperenaren borrokak jaso zuen sariagatik izan ez balitz. Lehiakortasunaren saria lortu zuen Eibarren, Otxoa Memo­rialean, Euskal Herriko txirrindulari onenen artean.
Saririk gabe geratu zirenak, lan haundia eginda ere, Tasio Semperena eta Jaime Romero izan ziren, Riberas de Loiolan, zorte txarra tarteko.
Eta jubeniletan, azkenik, bertan behera geratu zen Urko Semperenaren lasterketa, ero­riko asko izan zirelako.

Matxura eta erorikoagatik, garaipenaren lehiatik kanpo
Alebin eta infantilek hasi zu­ten asteburua, Riberas de Lo­io­lan, eta euripean egin zituzten bi lasterketak, oso-osorik. 
Lasterketa buruan izan zen Tasio Semperena bukaerara arte, baina 600 metro falta zirenean, pedaletik atera zi­tzaion oina, eta garaipenaren lehiatik kanpo geratu zen. Tropeleko kide guztiek aurreratuta, 19garren sartu zen helmugan, haserre.
Ez zuen zorte hobea izan Jaime Romerok, infantiletan. Hainbat astetako bajatik buel­tan, bikain mantendu zen dozena bat laguneko taldean, lasterketa buruan. Bai­na bi itzuli falta zirenean, juxtu au­rrean erori zitzaion tal­dekide bat, eta gelditu be­har izan zuen, berriz taldean sartzeko aukerarik gabe. 11garren iritsi zen helmugara.

223 txirrindulariren artean, saiatuena Semperena
Igandean, berriz, Euskal Herri osoko 223 txirrindulari elkartu ziren Eibarren, kadeteen Otxoa Memoriala lehiatzeko; tartean, bi astigartar: Telmo Semperena eta Tomas Oter­min. Erorikoengatik, proba gelditu behar izan zuten 40 minutuz, eta berriz ekin ziotenean, protagonista izan zen Semperena. Ihes egin, eta lasterketa buruan izan zen, tal­de batean aurrena eta ba­ka­rrik gero. Eta harrapatu zutenean, berriro saiatu zen, bes­te eraso bati erantzunez.
Azkenean, 40 lagun geratu ziren aurreko taldean, garaipena esprintean lehiatzeko, eta nekeak neke, hor zen Sem­perena ere, 30garren. Be­re saiakerek errekonozimendua izan zuten helmugan, eta lehiakortasunaren saria jaso zuen podiumean.
Oterminek ere lortu zuen proba bukatzea (126 bakarrik sartu ziren helmugan), eta 68garren izan zen.
Hortik gertu, Elgoibarren, jubenilen lasterketa abiatu zen, Urko Semperenarekin, bai­na ez zen bukatuko. Ero­ri­ko asko tarteko, eta anbulan­tzia faltan, bertan behera ge­ratu zen lasterketa, 60garren kilometroan.

Lau zita, asteburu honetan
Gaur goizean, Zumaian ari­ko dira kadeteak. Jube­ni­lek, be­rriz, zita bikoitza dute: An­tzu­o­lan arratsaldean, eta Zarau­tzen bihar arratsaldean. Ale­bin eta infantilak bi­har goizean ariko dira, Irunen.