Apfelwein Weltweit Nazioarteko Sagardoen Azoka burutu zuten aurreko asteburuan Alemaniako Frankfurt hirian. Eta bertan eman zieten Pomme D’Or (edo Urrezko Sagarra) nazioarteko saria Astigarragako Zapiain, Astarbe eta Bereziartua sagardotegiei.
Sagardogileen Elkarteak saridunak zoriondu ditu.
Lau sari, Astigarragara
Guztira lau sari irabazi dituzte bertako sagardotegiek. Zapiainek bi: bata bere sagardo natural bereziagatik, eta bestea, merkaturatu berri duen Bizi-Goxo postrerako sagardoagatik. Astarbek Pomme D’Or bat, ByHur, sagardo apardunagatik. Eta Bereziartuaren sagardo naturala izan da laugarren sariduna.
«Sagardotegiak egiten ari diren lana erakusten dute»
Gipuzkoako Sagardogileen Elkarteak Kronikara bidalitako prentsa-oharraren bidez, hiru saridunak zoriondu nahi izan ditu, Sagardogileen Elkarteko Astarbe eta Bereziartua, baita Zapiain ere.
Elkartearen ustez, «emaitza hauek erakusten dute gure sagardotegiak egiten ari diren lana, eta lan horrek nazioartean duen errekonozimentua».