Bihar burutuko den herri galdeketaren aurrean, Euskadiko Podemos-Ahal Dugu alderdiak bere iritzia jakinarazi du prentsa-ohar bitartez.
Bertan, pozik agertu da hondakin bilketa-sistemari buruzko «erabakia herri galdeketaren bitartez hartuko delako». Hala ere, alderdi moreak dio enez, «Astigarragako Plenoak aho batez onartutako galdera mugatua da». Izan ere, beraien ustez, «kontsultan proposatzen direnak baino aukera gehiago eman behar ziren».
«Herri bakoitzaren egitura eta biztanleriari egokitzen zaion bilketa sistema bilatu behar da»
Ildo beretik, Euskadiko Podemosek dio: «herri bakoitzaren egitura eta biztanleriari egokitzen zaion bilketa sistema bilatu behar da, Hondakinen Direktibak eta 2020 konpromezuek ezartzen dituzten birziklapen-mailak bermatzen dituena».
Hala ere, alderdi moreak argi daukana da: «ezin da 3-4 urtero sistema aldatu, eutsiezina delako».
«Zubietako errauskailua bezalako azpiegituren aurka»
Herri bakoitzak bere bilketa-sistema aztertu behar duela diote, baina muga bat jarrita: «beti egongo gara Zubietako errauskailua bezalako azpiegituren aurka, ingurugiroan eta pertsonen osasunean duen eraginagatik eta duen kostu altuagatik».