Larunbatean aurkeztu zuten XIII. Berria Txapelketa Lasarte-Oriako Goiegi jatetxean, Patxi Jauregi, Euskadiko Euskal Pilota Federazioko presidenteak; Andoni Alvarez, Berria egunkariko ordezkariak; eta Rufino Rekalde, Hernaniko delegatuak.
Txapelketaren inguruko xehetasunak azaldu ondoren, kluben arteko zozketa egin zuten, partiduak finkatzeko. Aurrenekoak bihar jokatuko dira: goizeko 11:00etan, Hernanin, Amurrio (Araba)-Uharte (Nafarroa); eta arratsaldeko 16:30etan, Andoainen, Oteiza (Azkoitia)-Lapke (Lazkao).
Harrobia indartzeko asmoa
Aurreko urtean baino klub gehiagok hartuko dute parte aurten, txapelketan. Hain zuzen ere, Euskal Herri osoko 22 talde onenak ariko dira lehian: Gipuzkoako zazpi, Nafarroako sei, Bizkaiko bost, Arabako hiru eta Iparraldeko bat.
Era berean, beste berritasun bat ere izango da aurtengo hamahirugarren edizio honetan: talde bakoitzak pelotari bakarra fitxatu ahal izango du. Orain arte, bi fitxatu zitzaketen, baina aldatu egin dute legea. Rufino Rekaldek azaldu zuen aldaketa honen helburua: «epe ertainera, taldeek beren pelotariekin soilik jokatzea. Bide horretan, fitxaketa kopurua murriztu dugu». Izan ere, «profesionalik ez legoke, harrobirik gabe».
Iazko marka hobetzea du helburu Hernanik; hasi bezala, txapelketatik kanpo geratu baitzen. 2014an, berriz, hirugarren egin zuen.
Lehia, hiru mailatan
Lehiaketa sistema, berriz, ez da asko aldatu. Ohi bezala, hiru mailatan jokatuko da: kadeteetan, jubeniletan eta nagusietan.
Hiru partiduetatik bi irabazten dituen taldeak lortuko du garaipena, eta txapelketan aurrera egitea. Hala ere, izango da berezitasunen bat: aurreneko bi partiduak elkarte batek irabazten baditu, tantoen sistema aplikatuko da, horrela, azken partiduak ere emozioa izan dezan.
Hasi eta bukatu, Hernanin; gainontzekoak, salgai
Txapelketa bihar bertan hasiko da, eta partiduetako bat Hernanin jokatuko da; goizekoa. Arratsaldean, Andoainen izango da beste bat.
Bukatu ere, ohi bezala, Hernanin bukatuko da txapelketa, ekainaren 26an.
Gainontzeko jaialdiak, berriz, 300 euroren truke erosi ahal izango dira. Hain zuzen, beste jaialdi batzuetarako frontoiak ere zehaztu dira: apirilaren 30eko partidua Iparralden jokatuko da, maiatzaren 13koa Galdakaon, eta maiatzaren 22ko bat, Andoainen.
Sariei dagokienez, ez da aldaketarik izan. Elkarte txapeldunarentzat, 3.000 euro eta pelotari bakoitzarentzat oroigarria eta txapela. Txapeldunordearentzat, 2.000 euro eta pelotarientzako oroigarri bana. Eta hiru eta laugarren sailkatuentzat, 1.000 euro.
2014ko mailara bueltatzea helburu, Hernanik
Bere onena erakusten saiatuko da Hernani, beti bezala. Hala ere, lehengo urtekoa atzean uzteko ahalegin berezia egingo du, hasi bezala, txapelketatik kanpo geratu baitzen. Duela bi urte, berriz, hirugarren sailkatzea lortu zuen. Hala ere, iazko irabazlea, Usurbilgo Pagazpe, izango da faboritoa.
XIII. BERRIA TXAPELKETA EGUTEGIA
Final hamaseirenak
- Apirilak 17: Amurrio-Uharte eta Azkoitia-Lapke.
- Apirilak 24: Lea Ibarra-Olgetan eta Zugarralde-Bortziriak.
- Apirilak 30: Iparralde-Txukun Lakua
- Maiatzak 1: Hernani-Danok Lagunak.
Final zortzirenak
- Maiatzak 8: Zaramaga-Erreka eta Pagazpe-apirilaren 17ko irabazlea.
- Maiatzak 13: Adiskide-apirilaren 17ko irabazlea.
- Maiatzak 15: Zazpi Iturri-apirilaren 24ko irabazlea.
- Maiatzak 22: Oberena-apirilaren 24ko irabazlea, eta Gazteleku-apirilaren 30eko irabazlea
- Maiatzak 29: Markina-maiatzaren 1eko irabazlea, eta Buruzgain-Ilunpe.
Final laurdenak
- Ekainaren 5ean eta 12an, bina partidu.
Final erdiak
- Ekainaren 19an, bi partidu.
FINALA
- Ekainaren 26an. Hernanin.