Gipuzkoako Foru Aldundiaren aurrean agerraldia egin zuen Erraustegiaren Kontrako Mugimenduak lehengo larunbatean, maiatzaren 29ko mobilizazioen berri emateko.
«Osasunaren aldeko eta erraustegiaren kontrako giza-kate bat, Onkologikoa eta Foru Aldundia lotuko dituena», osatzea da asmoa.
Erronka, 5.000 lagun biltzea
Bi puntu horien arteko distantzia 5km-takoa da, eta horregatik, metroko pertsona bat beharko dutela kalkulatuz, 5.000 pertsona biltzeko «erronka haundia» jarri dute. «Horregatik, herritarrei ekimen honetan parte hartzeko deia egiten diegu».
Ibilbidearen zergatia ere azaldu zuten. «Zergatik hasi Onkologikoan? Ez dugulako han bukatu nahi. Zergatik bukatu Foru Aldundian? Bertan hasi daitekeelako behar baino pertsona gehiago Onkologikoan bukatzera eraman ditzakeen bidea».
«Anbereseko erraustegiak ere eztanda egin zuen, ez aspaldi-aspaldi, joan den otsailean baizik»
«Datu zientifiko sendoak»
Mobilizatzeko arrazoiak ere eman zituzten, larunbateko agerraldian. «Badaudela datu zientifiko sendoak esateko hondakinak erretzea asoziatzen dela minbizi-kasuen eta hilkortasunaren haunditzearekin, baita beste hainbat gaixotasun ugaltzearekin ere, erraustegi batetik 10 kilometroko inguruan bizi den populazioan».
Era berean, eguneratutako datuak daudela azpimarratu zuten. «Esaterako, Carlos III Unibertsitateko ikerketa-txostena, minbizia eta errausketa lotzen dituena, ez da orain dela 20 urtekoa, ezta orain dela hamar urtekoa ere, 2014ko baizik, eta erraustegi modernoak ere kontuan hartzen ditu. Anbereseko erraustegiak ere eztanda egin zuen, ez aspaldi-aspaldi, joan den otsailean baizik».
Foru Aldundiak, «eufemismoa»
Bestalde, salatu zuten Foru Aldundiak duen jarrera. «Energia balioztatzeko planta eufemismoa motz geratu omen zaie, eta, trukean, Gipuzkoako Ingurumen Konplexua esaten hasi dira, konplexurik gabe. Norbaitek gauzak bere izenez ez deitzeko hainbeste esfortzu egiten duenean, logikoa da herritarrok pentsatzea ziria sartu nahi digutela».
Era berean, Erraustegiaren Kontrako Mugimenduak salatu zuen Foru Aldundiak «enpresa pribatuen esku» utzi nahi duela erraustegiarekin zerikusia daukan guztia. «Kutxa publikotik zein herritarron poltsikoetatik sekulako dirutza atera eta esku pribatuetan uzteko lankidetza publiko-pribatuaren bidez».