Hernaniko Haur Eskolan 2012an jarri zen martxan Ekolapiko proiektua, elikadura ekologikoa eta osasuntsua eskoletako jangeletan txertatzeko.
Baina ohitura osasuntsu horri jarraipena eman, eta etxeetara zabaltzeko asmotan, hitzaldia emango du gaur Sabrina Patok, 17:30etan Haur Eskolan (Sagastialde auzoa).
Hernanin, dagoeneko, martxan dago proiektua. Esperientzia positiboa izan dela uste duzu?
Bi hilabetetan proba egin zen, eta segidan, martxan jarri genuen proiektua. Aurretik ere, Haur Eskolak herrian egiten zituen erosketak, eta, ondoren, bertako sukaldean prestatu. Baina ez zituzten elikagai ekologikoak erosten. Gero hasi ziren Hernaniko baratzezain ekologiko bati, Imanol Altunari erosten. Eta gainontzeko gaiak, Lurreko dendan erosten dituzte.
Zergatik, ekologikoa?
Arrazoiak asko dira. Osasunaren aldetik, besteak beste Maria Dolores Raigonen txostenek diote nutritiboki aberatsagoak direla elikagai ekologikoak. Bestetik, lurrarentzat onuragarria eta jasangarriagoa da, eta batez ere, herrian bertan ekoitzitakoa erosten bada; garraioarekin gutxiago kutsatzen da. Azkenik, hezkuntza da beste adar bat: familiak zuzeneko harremanetan jartzea ekoizlearekin.
Ekologikoak, ordea, garaian garaikoa ere esan nahi du, eta pediatra batzuek nahiago omen dute produktu asko ez nahastu...
Hauen artean ere zabaltzen ari da ekologikoaren aldeko apustua. Eta guk ez dugu, inolaz ere, kontra egiten. Jangeletan, adibidez, haur bakoitzaren arabera moldatzen gara, pediatraren gomendioak jarraituta.
Haur Eskolan errotuta dago proiektua, beraz, zergatik emango duzu hitzaldia?
Ez dugu nahi Ekolapiko eskolan bakarrik geratzea. Gizarteari zabaltzea dugu helburu. Egun, ia denek dakite zer den ekologikoa. Baina batzuetan, ez dute modu orekatuan kontsumitzen. Hori irakatsi nahi dugu. Jarraipena eman diezaiotela, etxean ere.
Haurrentzako bezala, helduentzako ere onuragarria da ekologikoa?
Noski. Eta gaurko hitzldia irekia da; baita guraso ez direnentzako ere.