Goizuetako Udalak abenduaren 22ko Plenoan onartu zuen, Desgaitasuna duten pertsonei aparkatzeko txartelak ematea arautzen duen ordenantza. Jendaurrean egon ostean, otsailaren 23ko Plenoan behin betiko onartu zen; eta orain, Nafarroako Aldizkari Ofizialean argitaratu berri da.
Txartelaren balioa, 5 urtekoa
Ordenantzaren helburua da, desgaitasuna duten pertsonendako aparkatzeko txartelak banatzeko eta erabiltzeko oinarrizko baldintzak arautzea.
Ordenantzan zehazten da, besteak beste, aparkatzeko txartela soilik titularrak erabiltzeko izanen dela, joan-etorrietarako ibilgailuetan erabili dezan; erabili ahal izanen da titularrak ibilgailua gidatzen badu edo ibilgailuan badijoa. Txartel bakoitza matrikula zenbaki bati lotuta egonen da.
Zehazten da, baita ere, aparkatzeko txartelaren balioa bost urtekoa izanen dela; hala ere, bukatutzat emanen da Goizuetako erroldan baja ematen bada. Epea bukatu aurretik, txartela berritzeko eskaera egin beharko da.
Eskaera, Udalean
Txartela Udaleko erregistro orokorrean eskatu behar da, eta aurkeztu behar dira: eskatzailearen izen-deiturak; desgaitasuna duen pertsonaren bi argazki, Nortasun Agiriaren neurrikoak, koloretan; NAN; eta errolda ziurtagiria. Eskatzen diren baldintzak betez gero, aparkatzeko behar den txartela emanen dute.