Duela sei urte, 2010ean, Hernaniko Gazte Asanbladak Olinpiadak egiteko garai bateko ohitura berreskuratu zuenetik, laugarren edizioa dugu aurtengoa, eta atzo eman zioten hasiera Jokoa ez da amaitu lelopean.
Nazioarteko sukaldaritza, eguna hasteko
Goizean goizetik nabaria zen mugimendua herriko kaleetan barrena, mahaia, suak, janaria... baita kolore desberdinetako kamiseta zeramaten gazteak ere, han hemenka zebiltzatzen beraien azken momentukoak egiten.
Dena prest zegoenean, 11:00ak pasata, hasi zen aurreneko proba: nazioarteko sukaldaritzarena. Bi orduz egon ziren 23 taldeak beraien platera egiten, bakoitzari egokitutako herrialdearekin lotura zuena: Uzbekistan, Maroko, Ekuador, Senegal edo Estatu Batuak.
Behin platerak bukatuta, jatorrizko herrialdeko pertsona batek dastatu zituen platerak eta zaporea, aurkezpena eta herrialdearekin zuen lotura baloratu zituen. Egindako lanari esker, Estatu Batuetako janaria prestatu zuen Partido bundista taldeak hartu zuen aurrea sailkapenean.
Ekitaldia, eta gero, O Faktorea
Arratsaldeko 16:15ak aldera ekin zioten Aker eta Sorginak Olinpiaden hasierako ekitaldi nagusiari. Azkeneko 6 urteetako ibilbidea gogorarazi ondoren, 2016ko Gazte OlinpiadeI hasiera hasiera eman zien su olinpikoa piztu zuten, bertaratutakoen txalo eta algaren artean. Tartean Estitxu Agirrek Olinpiadei buruzko abesti berezia kantatu zuen, eta Miren Yustek lagundu zion gitarraren doinuaz.
Eguneko probekin bukatzeko, talde bakoitzak bere burua aurkeztu zuen O Faktorean. Batzuk hobeto egin zuten, beste batzuk okerrago, baina erabaki hori epaimahaiaren esku geratu zen, Miren Gojenola, Mikel Laskurain eta Txaro Unzillaren esku, hain zuzen.
Hurrengo zita, ostegunean
Ostegunean izango da patinen proba, herriko kaleetan barrena ibiliko dira gaueko 22:00etatik aurrera.