Egun senialatua da martxoak 8; Emakumeen Nazioarteko Eguna. Baina ospakizuna ez da egun bakarrera mugatu, Goizuetan, Aranon eta Ereñotzun.
Pelikula eta afaria, Goizuetan eta Aranon
Hasteko, Coria eta itsasoa pelikula ikusteko aukera izan zen lehengo igandean, Goizuetan, eta pelikula horixe bera jarri zuten Aranon, ostegunean.
Horrez gain, afari eder baten bueltan bildu ziren emakume goizuetarrak martxoak 8an bertan, Umore Ona elkartean. Adin guztietako emakumeek jai-giro ederrean pasa zuten gaua.
Apirilaren 9an ipuin erotikoak kontatuko dituzte Goizuetan.
Ereñotzun, ‘Emakume hernaniarrak plazara’ bekaren aurkezpena
Ereñotzun, berriz, astelehenean aurkeztu zuten Emakume hernaniarrak plazara beka. Batetik, Hernaniko Udaleko Berdintasun Sailaren III. Bekaren emaitza aurkeztu zuten: Maialen Apezetxea eta Mikel Ozaita antropologoek egindako liburua, Ilunpetik Argitara. Emakume langileak iruditan. Hernani 1939-1975 izenburuduna.
Bestetik, jakinarazi zuten IV. Beka ere martxan dagoela: apirilaren 4ra arte aurkeztu daitezke proposamenak. Oraingoan, emakume hernaniarren biografiak bildu nahi dituzte. Oinarriak: www.kronika.eus.
Ipuin erotikoak apirilean, Goizuetan
Bestalde, Goizuetan, beste zita bat daukate oraindik. Apirilaren 9an helduentzako ipuinak, erotikoak, kontatuko dituzte 19:00etan Umore Onan.