Pasa den astean bi proba oso gogorretan hartu zuen parte Urko Semperena txirrindulari astigartarrak, lau egunetako tartean.
Ostegunean, Durangoko Aitor Bugallo Memoriala jokatu zen; 80 kilometro, Goiurako portura bi igoerarekin, eta %17ko desnbibelarekin.
Igandean, berriz, Agurainen, XLI. Sallurtegi Saria jokatu zen; 79 kilometrotako ibibidea, eta Opakuara igoera bi aldeetatik.
Proba bana jokatuko dute asteburuan alebin, kadete eta juniorrek.
Ingelesak aurretik, susmo txarra eraginez
Durangoko proban Adan Hartley eta Charles Quarterman izan ziren nagusi, 142 txirrindulariren artean. Aurreneko igoeran pelotoia dezente txikitu zen, eta bigarrengoan, are gehiago zatitu. Txirrindulariak pixkanaka iritsi ziren metara, ingelesen atzetik, eta Urko Semperena 35garrena izan zen.
Igandean partehartzaile berberak izan ziren Agurainen, eta Urko Semperenak ikaragarrizko lana egin zuen aurreneko partean. Hirugarren kilometroan alde egin zuen beste hiru txirrindularirekin, eta aurreneko tarteko helmuga pasata, lasterketako buru zen. Opakuara igotzen, ordea, aurrena ingelesek eta Mikel Arregi altzuolatarrak pasa zuten, eta geroxeago, pelotoieko indartsuenek. Helmugara 60garren postuan iritsi zen.
Ingelesek irabazi zuten berriro, pelotoiari tarte nabarmena aterata, eta horrek, epaileen artean susmo txarra eragin zuen. Horrela, hauen bizikletak aztertu, eta Quarterman deskalifikatzea erabaki zuten, maila horretan onartzen zena baino garapen haundiagoko bizikleta erabiltzeagatik.
Hiru proba, asteburuan
Gaur arratsaldean bi proba jokatuko dituzte txirrindulari astigartarrek: alebinek, Hondarribiakoa; eta kadeteek, Zestoako III. Gurutzeaga Saria.
Juniorrek, berriz, goizean hartuko dute parte XLII Amaika Bat Sarian, Deban, eta bihar, Ustaritzeko Criterium Junior Trofeo Biltoki proban. y