Gobernu jeltzaleak jakinarazi du «aurreko legealditik zuhaitz mantentze lanei lotuta jaso dituen kexei aurre egiteko», txosten teknikoa eskatu diola lorezaintza enpresa bati.
Segurtasuna bermatzea
Horren arabera, hainbat zuhaitz kimatu eta beste batzuk aldatzea erabaki da, azken Obra eta Zerbitzuen batzordean. «Irizpide garrantzitsuena izan da pertsonen eta ondasunen segurtasuna bermatzea. Horretarako kimatuko dira, argiterian traba egiten duten adar arriskutsuak, eta baita trafiko seinaleak ezkutatzen dituztenak ere».
Era berean, kimatu egingo dira «terraza pribatuetan sartzen diren adarrak eta fatxadak ukitzen dituztenak».
Kimatu eta aldatu
Kimaketak egingo dira: Donostia ibilbidean, Nabarra Oñatzen, Amarrandegi kalean, Murgia parkean, Pelotari kalean eta Galtzaur-Aranibarren. Eta Kale Nagusiko eta Joakiteneko zuhaitzen adaburua estutu egingo dute.
Bestalde, «espezie egokiagoak jartzeko» aldatu egingo dituzte Leku Ederreko makalak, Santio Zeharreko astigarrak eta Troia ibilbideko tiloak.