Plenoan mozioa aurkeztu zuela astebete pasa dela gogorarazi du A3 Orain! taldeak prentsa oharrean, eta azaldu du «argi gorriak pizten» ari zaizkiela: «Udal Gobernuak, alkateak barne, ez baitio kasu haundirik egin aurkeztu eta onartu zen mozioari».
Era berean, kezka agertu du, hainbat gauza ez datozelako bat onartutako mozioarekin.
«A3 lortzea da helburua, ala Foru Aldundian proposamena aurkeztea?»
Hilaren 19an egindako Plenoan onartu zen mozioak esaten duena gogorarazi nahi izan du A3 Orain! taldeak, prentsa oharrean: «Astigarragako Udaleko Talde politiko guztiek (EH Bildu, EAJ-PNV eta PSE-EEk) bat egiten dugu A3 Orain! Lan Taldeak egiten duen aldarrikapenarekin: A3 Orain! Behar dugulako».
«Udalari eskatzen diogu mozioa irakurri eta esaten duenari zehatz jarraitu diezaiola»
Baina, A3 Orain! taldearen esanetan, «alkatearekin bildutakoan entzun genuena eta prentsan irakurritakoa ez dator bat onartu zen mozioarekin». Hain zuzen, bilera horietan eta prentsan ondorengoa azaldu dela dio taldeak: «Helburua da proposamen egingarri bat osatu eta aurkeztea Foru Aldundian, astigartarrek zerbitzua jasotzen segi ahal izan dezaten». Eta A3 Orain! taldeak ondorengoa galdetu du: «zertan geratzen gara; A3a defendatu eta lortzea da helburua, ala proposamen egingarri bat osatu eta aurkeztea Foru Aldundian?».
Mozioa, «bide orri zehatza»
Hori guztia kontuan hartuta, A3 Orain! taldeak eskaera egin nahi izan dio Udalari, aurkeztu eta onartutako mozioan jartzen duena zehatz-mehatz jarraitu dezan.
«Guk mozioa aurkeztu genuen mozio hori bide orri zehatz bat izate aldera, guztiok A3aren defentsan bat egin dezagun eta berreskuratu dezagun. Ikusten dugu Udalak ez duela hain garbi zein den bide orria, eta eskatzen diogu mozioa irakurri eta esaten duenari zehatz jarraitu diezaiola». Gaineratu du «lanerako prest» daudela. «Adi egongo gara, eta lanerako erabateko prestutasunarekin, batera indar haundiagoa dugulako».