«Etxebizitza duin bat izateko eskubidearen kontrako helegitea da, Alderdi Popularrak aurkeztu duena. Bilatzen du, etxebizitzak negozio bat jarrai dezala izaten bankuentzat, higiezinen agentzientzat eta espekulatzaileentzat», salatu dute Araba, Bizkaia eta Gipuzkoako Kaleratzeak Stopek, eta Gipuzkoako IRPH Stop plataformak, prentsa ohar bidez.
EAEko Etxebizitza Legearen kontra, helegitea aurkeztu du Espainiako Gobernuak, eta lau taldeek eskatu diote, atzera botatzeko: «Alderdi Popularrari exijitzen diogu, helegitea erretira dezala. Horrekin, kaleratzeen kontrako neurriak indargabetu nahi dituzte; gaur egun dagoen etxebizitza beharra asetzera zuzendutako guztiak indarrean sartu ez daitezen lortu nahi du», salatu dute.
«Botere autonomikoa mugatu nahi dute, bide judizialetik»
Kritikatu dute, gainera, Alderdi Popularra saiatzen dela «botere autonomikoa mugatzen, bide judizialetik. Korporazio haundien eta finantza erakundeen interesak jartzen ditu, etxebizitza eskubidearen gainetik».
Bestalde, EAJri ere egin diote eskaera bat: «azaldu dezala zer egin duen lege hau babesteko, Estatuko Administrazioak eta EAEkoak osatutako bitariko lankidetza batzordean; hain justu, legearen kontra bozkatu eta bederatzi hilabete pasa direnean».