Hernaniko kaleen «garbitasun falta» salatu du PSE-EEk, prentsa ohar baten bitartez, eta adierazi du, hori dela eta herria «nabarmen hondatuta dagoela».
Ricardo Crespok, Hernaniko sozialisten bozeramaileak, uste du horren arrazoia dela «kaleen garbiketarako eskaintzen den zerbitzu exkaxa», eta kritikatu du, parke eta plazen garbitasun eta mantenu falta are okerragoa dela auzoetan.
«Kexa asko jasotzen ari gara herritarren aldetik»
Crespok jakinarazi du, herritarren ahotik ere jaso dutela arazo horren inguruko kezka: «kexa asko jasotzen ari gara herritarren aldetik. Ez daude batere pozik, herriaren kanpoaldeko auzoetan egiten den garbiketarekin».
«Herria nabarmen hondatuta dago, kaleen garbitasun falta dela eta», salatu du PSE-EEk.
Auzo horien artean aipatu ditu Etxeberri, Antziola, Karabel, Lizeaga eta Zikuñaga: «kaleen garbiketa falta dago, zaborra pilatzen den zenbait tokitan, oinezkoentzako pasabideak deskuidatuta daude, eta zaborrontziak falta dira».
Garbiketarako, 10.000 edo 20.000 euro gehiago
Hori dela eta, PSE-EEk eskatu du haunditzea garbiketara bideratutako partida: «2016ko aurrekontuan, 50.000 euro daude jasota, baina badirudi ez dela nahikoa. Beraz, uste dugu 60.000 edo 70.000 eurora haunditu behar dela».
Gainera, eskatu du partida horren «zati haundi bat» bideratzea, auzo horietan «garbiketa sakon bat» egiteko, eta mantenua errebisatzeko, arazoa konpontzeko asmoz.
Udal Gobernuari adierazi dio, orain dela momentua gaiari heltzeko; hain justu, «garbiketa zerbitzua berritzea tokatzen denean».