Astigarragako Udal Talde sozialistak prentsa-ohar bitartez jakinarazi du Udaleko plenoari eskatuko diola «Europako Batasuna eta Turkiaren artean errefuxiatuen itzulera masiboari buruz adostu duten aurrehitzarmena baztertzeko». Mikel Durán udal ordezkariak azaldu duenez, «mozio honen helburua da Europar Batasunari eta bertako kide diren estatuei eskatzea premiazko erantzun humanitarioa emateko, errefuxiatuak sufritzen ari diren egoeraren aurrean». Horregatik, mozioak eskatzen du: «erretiratzea asiloari buruzko nazioarteko zuzenbidea edo Europar Batasunak sinatutako giza eskubideei buruzko hitzarmena errespetatzen ez duen edonolako akordio». Horrez gain, bere egiten du Pasabide Segurua manifestua, Europako erakunde sozial, sindikatu eta alderdi politiko askok izenpetutakoa.
Gaia Plenora eramango duela jakinarazi du PSE-EE udal taldeak prentsa-oharrean, bertan eztabaidatu eta bozkatzeko asmoz.