Hiru haur sahararrek Hernanin pasako dute udara aurten, Oporrak Bakean programaren barruan. Salka Ali Ramdam Fernando Estibarizen etxean izango da, hirugarren eta azken urtez; Usama Selma, Ana Sanzenean; bigarrenez; eta Leila Abdi Embar ere berriro etorriko da, Udalak egindako deialdiari erantzunez, familia bat topatu baita haurra berriro ere herrira ekartzeko.
Baina familia gehiago ere behar dira, eta izena emateko epea ostiralean bukatuko da. Lehengo urtean, 340 haur saharar etorri ziren Euskal Herrira, eta horietatik 3, Hernanira. Umeen bidaia gastuak Hernaniko Udalak ordaintzen ditu, eta herrian etxerik topatzen ez zaien haurrei aterpetxea ordaintzen die.
«Orain txikienak 10 urtekoak dira, eta errazagoa da»
Ana Sanzen etxean bost dira; senar-emazteak eta hiru seme. Orain 10 bat urte hasi ziren haur sahararrak etxera ekartzen. Hiru urtetan neska bat etorri zitzaien, eta lehengo urtean, Usama. «Lehen 7 urterekin etortzen ziren; oso gazteak ziren. Dena irakatsi behar zitzaien: semaforo gorriaren aurrean geldi egoten, hizkuntza... Kasketak erraz hartzen zituzten! Baina orain, 10, 11 eta 12 urterekin etortzen dira, eta errazagoa da. Gauzak behin esanda, nahikoa».
Gainera, «oso irekiak» direla dio. «Berehala eta erraz egokitzen dira. Saharan familia haundiak izaten dituzte, eta ohituta daude bat gehiago izaten. Seme gazteenarekin ederki konpontzen da Usama; beti elkarrekin!».
Izena eman eta informazioa lortzeko: 943 33 70 17 edo marijo-m@hernani.eus
«Etxeko printzesa da!»
Fernandok, berriz, seme-alabak haziak ditu, eta emaztea eta biok hartu zuten erabakia, haur saharar bat etxean hartzekoa. «Hiru arrazoi izan genituen: sentimentala, solidaritateagatik; kontzientzia politikoa, Espainiako estatuko gobernuaren erruz daudelako egoera horretan; eta denbora edukitzea, aurretiko erretiroa hartu bainuen».
Adinagatik, aurten azkeneko urtea izango da Salkarentzat, eta zerbait berezia egitea dute buruan. «Errioxara ere joan izan gara, baina agian, aurten, parke tematikoren batera joango gara. Etxeko printzesa da!».
«Familia gutxi animatzen da»
Ana Sanzek dio jende askok galdetzen diola esperientziaren inguruan, «baina familia gutxi animatzen da». Juani Vega laguna da horietako bat. «Lanagatik, ezin dut. Denbora behar duzu. Gero, egia da gure seme-alabekin ere ibiltzen direla, eta entretenitzen dira...».
«Udaleku eta igerilekuarekin, eguna egina!»
Bi familiek diote Hernaniko Udalak asko laguntzen duela. «Bidaia ordaintzen dute, udalekuak ere bai, osasun txartela... Aurreneko urtean pentsatzen duzu egunero egin behar duzula aparteko zerbait, baina udalekuetan oso ondo pasatzen dute. Egun erdian (09:30-13:00) hor, eta beste erdian, igerilekura joanda, nahikoa!».