Saharako bero itogarritik atera, eta Hernanin bi hilabete inguru pasatzen dituzte urtero, Saharako errefuxiatu kanpamenduetatik etortzen diren neska-mutilek. Behar beharrezkoa dute handik atera, eta bertako familiekin pasatzen dituzten aste horiek. Uda izanda, tenperatura oso altuak sufritzen dituzte kanpamenduetan, 50 gradu ingurukoak. Hortik ihes egiteaz gain, Hernanin dauden bitartean beharrezkoak dituzten mediku azterketak egiten zaizkie eta elikadura zaintzeko aukera ematen zaie. Eta bide batez, bi familia eta herrialderen arteko harremana sendotzen da.
Izen ematea, ostiralera arte
Aurten ere harrera familiak behar dira, umeak etxean hartzeko. Udalak laguntza ematen die familia horiei: haurren hegaldia ordaintzen du; udalekuak antolatzen ditu, umeek goiza elkarrekin pasa dezaten, eta familiek denbora librea izan dezaten; eta Hernaniko familiak elkartu egiten dira, planak elkarrekin egiteko asmoz.
Izena emateko epea ostiralera arte dago zabalik. Horretarako: 943 33 70 17, marijo-m@hernani.eus edo Plaza Feminista.