Hernani herria Turkian dagoen Semdinli herri kurduarekin senidetu zen 2013ko apirilean. Ordutik, Hernanik eta Semdinli herri kurduak, elkarrekin trukatu dituzte jakintza kultural, sozial, intelektual eta politikoak. Bestalde, Hernaniko Udalak urteak daramazki herri Kurduari elkartasuna adierazten, eta aurten, Newroz egunaren bueltan, Aste Kurdua antolatu dute, jardunaldi ezberdinez osatua.
Zer da Newroz Eguna?
Newroz Eguna Urte Berri eguna da kurduentzat, eta herri oso baten oroimen kolektiboa esan nahi du. Udaberriaren hasieran, martxoaren 21ean ospatzen dute, eta beraien jaiotza mitikoa ekartzen dute gogora: Kawa errementariak Zohak tiranoaren aurka lortu zuen garaipena, alegia. Newroz Egunean, eguzkiaren ezkutaldia bukatu dela ospatzen dute, eta ateak irekitzen dizkiete astro erregeak bere distira haundiena lortuko duen urtaroari. Kurduek, egun honetan, dantza eta salto egiten dute suaren bueltan, su hori askatasunaren ikur bezala ulertzen baitute. Ohitura hau debekatua egon da hamarkada luzez Turkian; 90 hamarkada hasieran gainera, ehundaka hildako egon ziren suaren inguruan daNtza eta salto egiteagatik. Turkiako gobernua konturatu zen ezinezkoa zela ospakizun honekin bukatzea, eta ukatzetik festa ofizial bihurtzera pasa zen. Argudioa izan zen, Asia erdialdeko turkiarrek antzinan ospatzen zuten festa zela.
Lau ekimen, astelehena bitartean
Aste Kurdua izendatu dute hasi berri dena, eta lau ekimen antolatu dituzte, jardunaldien barruan.
Bihar, hitzaldia emango dute Juan Bidaurrazaga eta Omer Ertenek: ¿Qué está pasando en Kurdistán Norte? Iluntzeko 19:00etan izango da, Biterin.
Ordu eta leku berean, La mujer en el movimiento de liberación de Kurdistán hitzaldia emango dute ostiralean, Julia Iglesias eta Maryam Fathik.
Larunbatean berriz, Diyarbakirreko haurrak pelikula proiektatuko dute, 19:00etan, Biterin. Azpitituluak izango ditu filmak, euskeraz eta gaztelaniaz. Film honek Donostiako Zinemaldiko Gazteriaren Saria jaso zuen 2009an; Miraz Bezar da zuzendaria.
Azkenik, datorren astelehenean, hilaren 21ean, Newroz Eguna izango da; Hernaniko Udalak sinbolo bat jarriko du udaletxeko balkoian, elkartasuna adierazteko.