Berrehun herritar baino gehiago elkartu ziren atzo Biterin, Hernanin egin nahi den herri galdeketaren inguruan hausnartu eta pausuak ematen hasteko asmoarekin. Herritar talde batek egin zuen deia, eta hernaniarren erantzuna nabarmentzekoa izan zen. Bi ordu baino gehiago iraun zituen atzoko batzarrak, eta bertatik hainbat ondorio atera zituzten.
«Prozesuak ahalik eta partehartze zabalena izan behar du»
Bertaratutako herritarrek argi dute, Hernanin martxan jarriko den prozesuak ahalik eta partehartze zabalena izan behar duela: «hori da filosofia, prozesu honen oinarria. Kontzentziatu behar dugu erabakia gure esku dagoela, eta ezin dela dena politikoen esku utzi». Prozesu hau demokrazia ariketa bat izan behar dela garbi zuten bertaratutakoek: «helburua kontsulta izanda, bidea ahalik eta partehartzaileena izan behar da».
Ilusioa berreskuratzeak eta beldurra galtzeak duen garrantzia ere, azpimarratu zuten atzokoan: «denon artean ilusioa berreskuratu behar dugu, eta beldurra galdu parte hartzeko, iritzIa emateko. Euskal Herri hobe bat nahi dugun heinean, Hernani hobe bat nahi dugu». Eta bide hori, herritar aktiboz osatua egon behar dela azaldu zuten: «bestela alperrik da».
Hurrengo batzarra, apirilaren 9an
Hurrengo hitzordua ere, zehaztu zuten atzo: apirilaren 9an, goizeko 10:00etan. Bilera horretatik aurrera, martxan hasiko da prozesua koordinatuko duen batzorde sustatzailea. Bide horretan, lantalde zehatzagoak osatuko dira, hala nola: informatika taldea, komunikazio taldea, harremanak lantzeko ardura izango duena, galdera zein izango den eztabaidatzen hasiko den taldea...
Bestalde, gogoratu zuten prozesu osoan herritarrek ateak zabalik dituztela: «dei egin diegu herritarrei gerturatu eta parte hartzera».
Kontsultarako hiru fetxa posible
Kontsulta egin daitekeen hiru data aipatu ziren atzo, nahiz eta oraindik ez den erabakirik hartu: ekaina, udazkena edo 2017ko udaberria.