Erraldoi bat sortu nahi dute Hernaniko Lanbide Heziketako Gizarte Berrikuntzako ikasleek. Kronikara bidalitako oharrean azaldu dutenez, prozesu horretan herritarren laguntza ezinbestekoa izango da: «zure laguntza eskatzen dizugu».
Oharrean hiru baldintza zehaztu dituzte: «1. Pertsonaiaren marrazkiak egitea, gorputz osoa eta burua bereziki ikusi daitezkeela; eta izena ere, zehaztea. 2. Ikastetxearen historia eta eginkizunekin lotura izatea; pertsonaiari buruzko bitxikeriak idatzi batean azaltzea baloratuko da. 3. Proposamenak aurkezteko azken eguna apirilaren 4a da».
200 eurotan baloratutako saria
Proposamenak ikastetxean entregatu behar dira, astelehenetik ostegunera, 08:00-14:30 eta 16:30-20:30 ordutegian. Jakinarazi dutenez erabakia eskolan hartuko da, eta epaimahai batek egingo du aukeraketa. Saria 200 eurotan baloratutakoa izango da. Bestalde, aurkeztutako proposamen guztiekin erakusketa bat antolatuko dute herrian.