Larunbatean Sagar moreen iraultza festa! antolatu du Gaztetxean, Hernaniko Bilgune Feministak. Kronikara bidali duten prentsa oharrean azaldu dutenez, joan den urtean kalera atera ziren, gaueko manifestazioa egitera: «beldurra lekuz aldatuko genuela esatera atera ginen. Oihukatuz nazkatuak gaudela emakume izateagatik pairatzen ditugun beldur, eraso eta mehatxuez. Erakutsiz, gero eta gehiago garela beldurrei aurre egiten diegun feministak».
Aurten ordea, festa ospatu nahi dute: «aldarrikapenez eta edukiz betetako festa izango da. Gauak, tabernak, sagardotegiak, eta kaleak gureak badirela aldarrikatzekoa. Jai-giro feministarako festa izango da, libre sentituko gaituena, gozatzeko festa, errespetatzekoa eta ligatzekoa. Erasotzaile eta babosorik gabea».
Azaldu dutenez, martxoaren 12an Hernaniko gaztetxea okupazio feminista izatea nahi dute, eta gonbidapena luzatu dute: «festa espazio politikoa ere badelako. Bihar subjetu feministak protagonista izango garen espazioa sortuko dugu Gaztetxean. Gune eraldatzaileak sortuz, jendartea eraldatzera goaz. Ezin bada dantza egin, ez delako gure iraultza. Beraz, bi hitzordu jarri dituzte bihar: 19:30etan La Furia Tilosetan, eta 22:00etatik aurrera, Gaztetxean.