Urtero bezala, Hernaniko ikasleak Eskola Agenda 21eko gaietan murgilduta dabiltza, Artelatz Ingurumen Zerbitzuaken eskutik eta Udalak bultzatuta. Udalak jakinarazi duenez, aurtengoan, Energia eta mugikortasuna aztertzen hasi dira, eta bereziki, energiaren gaia landuko dute.
Haur Hezkuntzatik hasi eta Batxilergora arte, «2.500 ikasle» ari dira lanean, «adinari egokitutako ekintzen bitartez».
Proposamenak, Alkateari
Ekintza horien ondoren, emaitza edo ondorio batzuk aterako dituzte ikasleek, eta «norberak bere egunerokotasunean bete beharreko konpromisoak hartzeaz gain, ikusitako gabeziak konpontzeko proposamenak luzatuko dizkiete Udal ordezkariei». Ekainean Alkatearekin egingo duten entzunaldian izango da hori.
Hiru ardatz nagusi
Duela hamabi urte jarri zuten martxan Hernaniko Eskola Agenda 21a Artelatz Ingurumen Zerbitzuak eta Udalak, hiru ardatz nagusirekin: curriculuma, ikastetxearen kudeaketa eta parte hartzea herrian.