Historian aurreneko aldiz, Hernaniko jubenilen taldeak Espainiako Kros Txapelketara sailkatzea lortu zuen; Yohanes Merinok, Anartz Artolak, Enaitz Larrañagak eta Zaikariae Elbagdadik osatzen dute, laukotea. Sekulako kros denboraldia daramakite, eta hasieratik izan dute helburu, Espainiako Txapelketara sailkatzea. Madrilen izan berri dira, eta Zarzuelako hipodromoan, Estatuko beste 280 korrikalarirekin batera hartu dute parte. Oso lasterketa ona egin zuten lauek, nahiz eta Zaikariaek erretiratu egin behar izan zuen; hori horrela, ezin izan zuten taldeka aurreneko posturik eskuratu. Hala ere, Mikel Von Wichmann entrenatzailearen esanetan «oso denboraldi ona egin dute».
Jaurtiketan ere, bikain
Euskadiko Jaurtiketa txapelketan ere, izandakoak dira CD Hernaniko atleta hernaniarrak. Igandean Durangon jokatu zen jaurtiketa luzeen Euskadiko Txapelketa, eta aipatzekoak dira Aitor Urkiak eta Irati Olaetxeak, jubenil eta kadetetan lortutako emaitzak; urrezko domina lortu zuten biek. Maider Artolak, kadetetan zilarra eskuratu zuen. Eta gainera, Urkiak, 56,96 metroko marka eginda, martxoaren 19an Salamankan jokatuko den Espainiako Txapelketara sailkatzea lortu zuen.
Berrizen, txikien krosa
Kategoria txikietan, Euskadiko Eskolarteko kros txapelketa jokatu zen Berrizen. Gipuzkoako hiru talde onenak izan ziren bertan, tartean, Gorka Lopez de Arregi, Ander Ezenarro, Unai Iraola eta Jon Tolosa infantilek osatutakoa. Lan ona egin bazuten ere, zazpigarren postuan bukatu zuten.
Guerrero ahizpak, bikain
Dozenaka emakume hernaniarrek hartu zuten parte Lilatoian, igandean. Aipatzekoa da, CD Hernaniko Maitane Guerrerok irabazi zuela; eta Hoki Guerrero ahizpak hirugarren egin zuela.