Hamabost egunetan 1.300 sinadura jasota, gaur arte luzatu zuen firma bilketa A3 Orain! taldeak: «datu pozgarriak dira, lanera gonbidatzen dutenak eta ilusioa pizten dutenak. Zorionak sinatu duzuenoi, eta dendari eta tabernarei, bilketa ahalbidetu duzuelako. Eta nola ez, gainontzekoak animatu sinatzera. Gero eta sinadura gehiago, A3 gertuago», aldarrikatu du taldeak.
Bilera, gaur iluntzean
Aurreko ostegunean egin zuen bilera taldeak, eta gaur jarri dute zita berri bat. Iluntzeko 19:00etan izango da, kultur etxean. Aldarrikapen pegatinak ere ari dira jartzen, herrian zehar.
Mozioa, hurrengo Plenoan
Mozio bat ere prestatu dute, hurrengo Plenoan aurkeztuko dutena, eta testu bat ere onartu zuten aurreko bileran, Udaleko alderdi guztiekin eta alkatetzarekin hitz egiteko.