Atzo izan zen Emakumeen Nazioarteko Eguna, martxoaren 8an, eta herriko hainbat txokotan egin zuten bat berdintasunaren aldeko aldarrikapenarekin.
Herri Eskolan, historiako hainbat emakume esanguratsuren berri izan zuten goizean, jolasen bitartez. Harituzek, berriz, postua jarri zuen Joseba Barandiaran plazan, puntuzko bufanda egiten jarraitzeko; eta mantala tailerra antolatu zuen arratsaldean.
Umorezko bakarrizketa ere izan zen kultur etxean, Maria La Vikingarekin, eta Udaleko Berdintasun Sailak, hirustak oparitu zizkien emakumeei.
Poesia emanaldia, etzi
Baina ekintza gehiago ere izango dira datozen egunotan, martxoaren 8aren bueltan. Etzi, ostiralean, Zure hatzaren ez galtzeko emanaldia eskainiko du Itxaro Bordak, Itsaso Gutierrez gitarristaren laguntzaz. Poesia musikatua izango da, doan; kultur etxean, 18:00etatik 18:40etara.
Eta asteartean, Dos días una noche zineforuma antolatu du Harituzek. Kultur etxean izango da, 18:00etan.