Datorren astean hasiko du ikasturtea Elkarbizi taldeak, eta hori baino lehen, 2016ko egitasmoa aurkeztu du. Buruntzaldea osoko jendeak osatzen duen taldeak hamabi ikastaroko programa osatu du.
Hitzaldi-ikastaro hauen helburua da, taldeak azaldu duenez, «gure arteko eredu baikorrenak azaltzea, ahaztu gabe, euskal herritarroi egindako kalte guztia erakustea ere eraikigarria izan daitekeela nahi dugun bizikidetza horren oinarriak sendo jartzeko».
Martxotik abendura, Buruntzaldea osoan
Hitzaldi-ikastaro sorta martxotik abendura bitartean burutuko da, Buruntzaldeako herri guztietan, baita Hernanin ere.
Aurrenekoa, datorren astean
Larunbaterako jarri dute aurreneko zita, 11:00etan Lasarten. Xavier Minguez eta Imanol Lizarralde doktoreen eskutik aztertuko dute gaia: Indarkeriaren kontakizuna. Osaera eta Bideraketa, memoria edo/eta historia bidez? Plazak mugatuak dira eta izena eman behar da aurretik: ganboiturri@gmail.com.
Apirilean, Hernanin
José Luis de la Cuesta Kriminologia Institutoko zuzendariak emango du bigarren ikastaroa. Hernanin izango da, apirilaren 9an: Bizikidetzarako justizia: transizionala eta restauratiboa.