Ikaragarrizko lana egin dute Ojuel eta Aizpitartek Euskal Herriko Txapelketan; partidu guztiak irabazi dituzte orain arte, eta gaur, 18:30etan Azkoitian, txapela lortzeko borroka egingo dute Irurtzungo Ezkurdia eta Bergeraren kontra. Lehengo urtean azpitxapeldun izan zen Ojuel; ordukoan, Lizeagarekin, eta aurtengoan, oraindik ere grina haundiagoarekin jokatuko dute finala. Hala ere, sailkapen fasean bi tantoko diferentzia besterik ez zieten atera Ojuel eta Aizpitartek Irurtzungo bikoteari, eta partidu gogorra espero da.
Lehia, beste bi txapelketatan
Bestalde, Urkizu eta Apezetxea seniorrek finalerdia jokatuko dute asteburuan. Bihar, 11:00etan Hernanin, Lasarteko Artetxe eta Elolaren kontra ariko dira, Udaberri Torneoko finalerdian. Bi bikoteak batere partidurik galdu gabe iritsi dira finalerdira, eta lehia haundia izango da.
Gipuzkoako Trinkete Txapelketan, berriz, finalean daude Lazkano eta Arizmendi jubenilak. Gaur arratsaldeko 16:15etan jokatuko dute Iruran, Azkoitiako Oteiza eta Azkoitia bikotearen kontra. Hernaniarrek sailkapen faseko partidu guztiak irabazi dituzte, eta entrenamenduei esker asko hobetu dute jokoa. Beraz, badauzkate aukerak, txapela lortzeko.