Ilunpetik Argitara. Emakume langileak iruditan. Hernani 1939-1975 izenburua duen liburua aurkeztu zuten asteazkenean, Berdintasun Sailaren III. Ikerketa Bekaren emaitza dena. Argazkien bitartez, Frankismo garaian emakumeek esparru desberdinetan egindako lana jaso–tzen du.
Maialen Apezetxea eta Mikel Ozaita antropologoek herritar askoren laguntzarekin egindako azterlana biltzen du liburuak: «zuek gabe ez litzateke posible izango hau dena», eskertu nahi izan zien Apezetxeak «argazkiak ematen, testigantzekin...» ikerketa egiten lagundu dieten guztiei.
«Asko kostatu zaigu argazkiak biltzea»
Apezetxea eta Ozaitak onartu zuten ez dela lan erraza izan: «asko kostatu zaigu argazkiak biltzea; izan ere, artxiboetan ez zegoen ezer, eta garai hartan kamerak ez ziren ohikoak».
Horrez gain, emakume protagonisten bila ere joan dira, baina askotan «zertara zatozte niregana? Nik ez dut lanik egin eta...» entzun behar izan dute, baina egileek diotenez, «lan haundia egin dute, kontua da errekonozimentu gabeko lana izan dela».
Proposamen berriak, apirilaren 4ra arte
Egun berean, IV. Ikerketa Beka ere aurkeztu zuen Berdintasun Sailak. Emakume hernaniarrak plazara! oinarri hartuta, historian zehar egon diren emakume hernaniarrak ezagutu nahi dituzte. Eta hori ikertu nahi dutenen proposamenak jasoko dituzte apirilaren 4ra arte. IV. Ikerketa Bekaren oinarriak www.kronika.eus-en ikusi daitezke.