Festa haundia egingo du gaur arratsaldean Gure Esku Dagok Hernanin. Arratsaldeko 18:30etan hasiko da Argitu Erabakia ekimena; orduan, txokolatada eskainiko dute Plaza Berrin. Ondoren, 19:15ak aldera, jada zerua ilunduta dagoenean, kriseiluak askatuko dituzte Zinkoenean.
Ereñotzun ere bai
Festa giroa izango da baita Ereñotzun ere. 17:00etan taloak egingo dituzte eta jarraian, haurrek puzgarrietan ondo pasatzeko aukera izango dute. Arratsaldeko 19:15etatik aurrera egingo dute hegan kriseiluek.
Argazki lehiaketa, martxoaren 13ra arte
Eguneko ekintzez gain, Argitu Erabakia ekimenaren barruan argazki lehiaketa bat ere antolatu dute. Martxoaren 13an bukatuko da argazkiak bidaltzeko epea, eta data hori pasata, Gure Esku Dagoren epaimahaiak erabakiko du zeinentzat izango den saria. Miren Rekondo, Ana Niño, Pablo Bengoetxea eta Alberto Elosegik osatuko dute epaimahi hori, eta saridunak bi lagunentzako otordua irabaziko du Fagollaga jatetxean.
Herritarrei deia, parte hartzeko
Gure Esku Dagok herritarrak animatu nahi ditu ekimenean parte hartzera, izan ere, «kriseiluei zerura joaten utziz Zinkoenea su argi ederrez apainduta ikustea guztion esku dago. Zeru iluna distira bereziarekin janztearekin batera, datozen hilabeteetarako ametsak eta nahiak lau haizeetara hedatu ahal izango ditugu hernaniarrok».