Bigarren urtez jarraian, finalean izango da Hernaniko bikote bat Euskal Herriko Txapelketan, nagusien lehenengo mailan. Ostiralean lortu zuten balentria, Paul Ojuelek eta Eneko Aizpitartek, mendean hartuta Lezamako bikotea, Aurtenetxe eta Bilbao (22-12). Horrela, Azkoitiaren kontra lehiatuko dute txapela, datorren larunbatean.
Gogorra izan zen partidua, bi atzelariak maila bikainean, eta aurrelariak gorabehera gehiagorekin. Berdinduta joan zen lehia, baina erdi partetik aurrera, nekea nabaritu zuen atzelari bizkaitarrak, eta Aizpitarteren nagusitasuna aprobetxatu egin zuen Ojuelek, jokoan gehiago sartu eta tantoak bukatzeko. Horrela, alde egin zuten hernaniarrek markagailuan, 22ra arte.
Nagusi izan zen Aizpitarte atzean, eta aprobetxatu egin zuen Ojuelek, jokoan sartu eta tantoak bukatzeko.
Pagolak eta Urruzolak, ezin
Ez zioten erremate berdina jarri Xabat Pagolak eta Iñaki Urruzolak, Gipuzkoako Trinkete Txapelketan. 40-29 galdu zuten semifinala, Oteiza eta Azkoitiaren kontra, eta ezingo dute iazko garaipena errepikatu. Ondo hasi arren (10-5), berehala hartu zuten aurrea azkoitiarrek, Oteizaren sakeekin eta hernaniarren akatsekin.
Finalean egongo direnak, azkoitiarren kontra, Ander Lazkano eta Endika Arizmendi dira, duela bi aste sailkatu baitziren.
Urkizu eta Apezetxea, Udaberri Torneoko finalean
Beste final baterako ere sailkatu dira hernaniarrak asteburuan. Udaberri Torneoko semifinala irabazi zuten Urkizuk eta Apezetxeak (22-3).