Sorkuntza egonaldiak antolatu dituzte, elkarlanean, Hika Teatroak eta Hernaniko Udalak. Helburua izango da, herritarrek parte hartzea Koadernoa zuri antzezlana sortzeko prozesuan. Zehazki, hernaniarrek jarraipena egingo diote obra estreinatu aurreko produkzioaren azken faseari, eta ikusle komunitate bat sortuko dute.
Martxoan hasiko du Koadernoa zuri antzezlanaren produkzioa Hika Teatroak, eta azarora bitartean, hainbat egonaldi egingo dituzte Hernanin, eta sortzen den ikusle komunitateak, garapena ikusiko du aurrez aurre, saio irekien bitartez.
Aurreneko datak, zehaztuta
Aurreneko hiru egonaldien datak jarri dituzte dagoeneko: martxoaren 14tik 18ra, apirilaren 18tik 22ra, eta maiatzaren 17tik 23ra. Egonaldi bakoitzeko, egun batean egingo dute saio irekia.
Saio horietan, ikusleak parte hartuko du sorkuntza prozesuan: testuaren irakurketa, aktoreekin muntaiaren hasierako proba-saioa, muntaia, lehen emanaldia eta ondorengo feedbacka.
Antzezlan honen oinarria da, Garcia Lorcaren Bernarda Alba obrako protagonista. Koadernoa zuri antzezlanak, «Euskal Herriko Bernarda haundietara hurbilduko gaitu. Emakume elizkoiak eta agintariak. Konfliktoa, emozioa, umorea eta poetika ditu osagai», azaldu dute. Arantxa Iturbe eta Agurtzane Intxaurragak idatzia da obra, eta Itziar Ituño, Nagore Aranburu eta Miren Gojenola izango dira protagonista nagusiak.
Bilera Biterin etzi, informazioa emateko
Hikak eta Udalak dei egin diete hernaniarrei, prozesuan parte hartzeko. Doan izango da, baina hori bai, izena ematen duenak, bost saiotan parte hartzeko konpromisoa hartu beharko dute. Horri buruzko informazioa emateko, bilera deitu dute etzi, asteartea, Biteri kultur etxean. Arratsaldeko 17:00etan izango da.