Ez Ohiko Plenoa bilduko da ostiral arratsean, Astigarragan. Iluntzeko 19:00etan izango da, Areto Nagusian eta bost punturen inguruan ariko dira bertaratutako talde politikoak.
Atez ateko kontsulta
Atez ateko hondakinen bilketa sistemari buruzko kontsulta egitea onartuta, galdeketaren prozedura onartzea falta da. Hori da hain zuzen, ostiraleko Plenoak hartuko duen erabakia. Parte hartze mahaiak aurretik egina du galdeketaren inguruko txostena, eta bertan azaltzen denez, kontsultaren deialdia egin eta 50 egunera izango da bozketa. Tartean, 19 eguneko epea izango da alegazioak aurkezteko, eta 10 eguneko epe bat ere zabalduko dute, botoa aurrez emateko. Udaletxeko idazkaritzan eskatu eta egin beharko da hori.
Kontsultan, 16 urtetik gorako astigartarrek izango dute botoa emateko aukera, eta udaletxean egingo da kontsulta: Pleno aretoan edo arkupeetan, eguraldiaren arabera. Sei mahai izango dira, orden alfabetikoari jarraituz.
Galdera bakarra izango da: zein hondakin bilketa sistema nahi duten herritarrek. Eta bi erantzun posible: atez atekoa edo kontenedoreena, organikoarentzat eta errefusarentzat ixteko sistema erabiliko dena. Boto paper bat jarriko da sistema bakoitzeko, kolore ezberdinetakoa.
EH Bilduk, bi mozio
Bestalde, EH Bilduk aurkeztutako bi mozio ere bozkatuko dira: bata, emakume kurduen hilketa salatzeko; eta bestea, Sahararen aldeko adierazpen instituzionala.