Zubietan eraiki nahi den errauste plantaren kontra egiteko martxak antolatu dira biharko. Hernanin Zero Zaborrek, goizeko 08:30etan jarri du zita, Plazan.
Baina beste herri batzuetatik ere abiatuko dira beste hainbat; Lasarte-Orian izango dute topagunea denek, 10:30etan, eta eguerdiko 12:00etan iritsiko dira Letabidera, errauste plantaren eremura. Gero, Zubietara elkarrekin jaitsi, eta 13:00etan izango dute ekitaldia, frontoian.
50 talde baino gehiago, martxarekin bat
Antolatzaileen esanetan, «atxikimendu ugari bildu ditu martxak». 50 talde baino gehiago, hain zuzen. Horietako batzuk, orokorrak: Ernai, Irabazi, Equo, Sortu, Bildu, Ezker Anitza-IU, Euskadiko CCOO, LAB eta ESK. Eta beste batzuk, Hernanikoak: Hernanin Zero Zaborrez gain, San Joan Konpartsa, Pala taldea, Sutu Hernani, Bilgune Feminista, Kooperazio Taldea, Bertso Eskola, Ereñotzuko Auzo Elkartea, Ereñotzuko Auzo Udala, Osiñagako Auzo Elkartea, Liletak taldea, Natza kultur elkartea, Berdintasun Kontseilua, eta Kaleratzeak Stop taldeak.
Hernaniko Udala ere, martxarekin bat
Bestalde, Hernaniko Udalak ere errauste plantaren aurkako martxarekin bat egiten duela azaldu du prentsa ohar bidez.
«Hernaniko Udalak bat egiten du EAJk eta PSEk gobernatzen duten Foru Aldundiak Zubietan egin nahi duen errauste plantaren aurkako martxarekin. Otsaileko udalbatzarrean (hilak 23) gehiengo osoz onartu zen Hernaniko Zero Zabor Taldeak aurkeztutako mozioa». Hori horrela, hernaniarrei martxarekin bat egiteko deia egin die.