Pista denboraldia alde batera utzi, eta karreterako denboraldia hasteko prest dira txirrindulari astigartarrak. Seik hasiko dute jarduna asteburuan, eta guztiek Victor Alvaro Construcciones taldean korrituko dute. Alebin, infantil, kadete eta junior mailan izango du ordezkaritza Astigarragak, karreterako txirrindularitzan.
Hondarribian, alebin eta infantilak
Alebin mailan, Aketza Bolado eta Tasio Semperena ariko dira. Jaime Romerok berriz, infantil mailako lasterketan hartuko du parte. Hiruak Hondarribiako Sarian lehiatuko dira gaur, arratsaldeko 16:30etatik aurrera.
Ibaetan, bi kadeteak
Kadete mailan bi ordezkari izango ditu Astigarragak: Tomas Otermin eta Telmo Semperena. Biak Donostiako Ibaeta auzoan izango dira gaur, izen bera duen Sarian parte hartzeko irrikaz. 38garren edizioa izango da aurtengoa, eta 16:00etatik aurrera jokatuko da.
Semperena juniorra Eibarren, bihar
Azkenik, junior mailako ordezkari bakarra Eibarren izango da bihar. Urko Semperenak Udaberri Sariaren 39garren edizioan hartuko du parte; goizeko 09:45etan hasiko da lasterketa.