Bat egin du Hernaniko Kaleratzeak Stop taldeak, Hernanin Zero Zaborren aldarrikapenarekin, eta parte hartuko du igande honetan, erraustegiaren kontra antolatu duten martxan.
Izan ere, taldeak adierazi du errausketa kaltegarria dela, «bai osasunarentzat eta baita ingurugiroarentzat ere».
«Erraustegia baino alternatiba bideragarriagoak badaude»
Modu berean, taldeak salatu du erraustegiak zabortegiak beharko dituela, «sortutako produktu arriskutsu eta toxikoentzat». Eta suposatuko lukeen gastuari ere egin dio erreferentzia: «aukerarik garestiena da, bai udalerriarentzat, eta baita herritarrentzat ere».
Eta gaineratu du Kaleratzeak Stopek: «enplegua murriztuko du errauste plantak, eta alternatiba bideragarriagoak badaude».
«Atxikimendu ugari bildu ditu martxak, guztira 50 talde baino gehiagok egin dute bat», azaldu dute antolatzaileek.
Herritar guztiei, parte hartzeko gonbitea
Arrazoi horiengatik, taldeak gonbitea luzatu die herritar guztiei, igandeko martxan parte hartzeko: «bertan izango gara gu, beste elkarte askorekin batera».
Izan ere, «atxikimendu ugari bildu ditu martxak», antolatzaileek azaldu dutenez. 50 talde baino gehiago batu dira guztira; tartean, hainbat talde eta eragile orokor (Ernai, Irabazi, Equo, Sortu, Bildu, Ezker Anitza-IU, Euskadiko CCOO, LAB eta ESK). Eta Hernaniko hainbat elkarte eta taldek ere egin dute bat: Hernanin Zero Zaborrez gain, San Joan Konpartsa, Pala taldea, Sutu Hernani, Bilgune Feminista, Kooperazio Taldea, Bertso Eskola, Ereñotzuko Auzo Elkartea, Ereñotzuko Auzo Udala, Osiñagako Auzo Elkartea, Liletak taldea, Natza kultur elkartea, Berdintasun Kontseilua, eta Kaleratzeak Stop taldea bera.
Martxak, inguruko hainbat herritatik
Hernanitik, 08:30etan abiatuko dira, Plazan elkartuta, Zubietako errauste planta egin nahi duten tokira bidean. Eta inguruko hainbat herritatik ere egingo dituzte martxak.
Lasarte-Orian izango dute topagunea, 10:30etan, hainbat herritako martxek, eta eguerdiko 12:00etan iritsiko dira Letabidera, errauste plantaren eremura. Gero, Zubietara elkarrekin jaitsi, eta 13:00etan izango dute ekitaldia, frontoian.