43garren edizioa izango du bihar, Hernaniko Zuhaitz Egunak, eta ohiturari jarraituz, zuhaitz berriak landatuko dituzte Aparrain mendian.
Guztira, 600 zuhaitz berri inguru izango dira: 300 pago, 150 gaztainondo, eta beste 150 bertako intxaurrondo.
Oinez joateko zita, goizean goiz Plazan
Aparraingo landaketa gunera joateko, oinez abiatuko dira helduak. Plazan jarri dute zita, udaletxeko arkupetan, goizeko 07:30etan. Hortik Pardiolara joango dira, Saratsain, Olatzar eta Ugaldetxo pasa, eta Aparrainera iritsiko dira. Bertako atseden gunean egingo dute hamaiketakoa.
Autobusez, gaztetxoak
Gaztetxoak, berriz, autobusez joango dira Ugaldetxora. Bereziki zuzendua dago, Lehen Hezkuntzako 3garren eta 4garren mailako ikasleei, baina beste edozein ere joan daiteke.
Goizeko 09:00etan hartuko dute autobusa Biteri aurrean, eta Ereñotzun ere geldituko da, 09:05etan. Aparrainera igo eta jaitsi oinez egingo dute, eta bueltako autobusa 12:30etan izango dute, Ugaldetxotik.