Mozioak izan ziren protagonista, asteartean Hernaniko Udalak egin zuen Plenoan. Aurkeztu ziren lau mozioak onartu ziren: TTIParen zein erraustegiaren kontrakoa, Saharar Errepublika Arabiar Demokratikoaren aldekoa, eta martxoaren 8aren ingurukoa.
Mozioen aurretik, hala ere, beste zenbait kontu eztabaidatu zituzten Plenoan. Aurrena, 2015eko aurrekontuaren exekuzioari buruzko informazioa eman zuen Isa Sanchez ogasun zinegotziak, eta zehaztu zuen, 30.492.520 eurokoa izan zela aurrekontu definitiboa. Modu berean, azaldu zuen urte bukaeran 8.660.000 euroko saldoa zuela Udalaren altxortegiak, «izango dituen gastuei aurre egiteko nahikoa».
Uraren tasan, salbuespena
Ondoren, uraren tasaren ordenantzan aldaketa bat egitea onartu zuten aho batez. Horrela, uraren azpiegituran matxura edo fugaren bat gertatzen denean, tasa bajuena aplikatuko zaio kaltetuari, epe bat emanez hori konpontzeko.
Aho batez onartu zuten, baita ere, bere horretan mantentzea zerbitzu publikoak emateagatiko tasak, Hernani eta Kantuz musika eskolenak, kultura arloko ikastaroenak, Udal Euskaltegiarenak eta kiroldegiko zerbitzuenak. Jabetze Eskolen prezio publikoak mantentzea ere onartu zuten.
Haur Eskolako jangela indartzeko, prezioak jaitsi
Aldatu egingo direnak, Haur Eskolako jangelaren prezio publikoak dira. Zerbitzuak behera egin duela azaldu zuen Esti Aldeiturriaga zinegotziak, eta berriro indartu nahian, proposatu zuten %28 jaistea; hilean, 102 eurotik 73 eurora jaitsiko da. Hobariak, berriz, mantendu egingo dituzte, eta nabarmendu dute, zerbitzu guztia bertako produktuekin ematen dela jangelan. Aho batez onartu zen aldaketa.
Onartu egin ziren, plenoan aurkeztutako lau mozioak: TTIParen eta erraustegiaren kontrakoak, SEADaren aldekoa eta martxoak 8aren ingurukoa.
Lau mozioak onartuta, eta interneten ikusgai
Ondoren, lau mozioei heldu zieten, eta baita laurak onartu ere. Ikusgai daude testu osoak, www.kronika.eus web orrian.
TTIParen kontrako mozioa izan zen aurkeztu zuten aurrenekoa; Merkataritza eta Inbertsio Lankidetza Transatlantikoaren kontrakoa.
Aho batez onartu zuten, Hernani TTIParen kontrako udalerri izendatzea.
Bigarren, Saharar Errepublika Arabiar Demokratikoaren aldekoa onartu zuten, aho batez hori ere. Larunbatean beteko dira 40 urte, SEADa aldarrikatu zutela. Mozioari, hainbat puntu gehitu zizkion Orain Hernanik: «eskatzen dugu, Sahara banatzen duen harresia eraistea, larunbatean Mendebaldeko Sahararen bandera zintzilikatzea udaletxeko balkoitik...», azaldu zuen Jaione Aristregi bozeramaileak.
Hernanin Zero Zaborrena ere onartu zuten, erraustegiaren kontrakoa, EH Bildu eta Orain Hernaniren aldeko botoekin, eta EAJ eta PSE-EEren kontrakoekin. «Ez da beharrezkoa, gastu neurrigabea suposatuko du, eta osasunerako arriskutsua da», gehitu zuen Mattin Aldaiak, EH Bilduko zinegotziak.
Eta azkenik, martxoaren 8aren ingurukoa aurkeztu zuen Koordinadora Feministak: Hau ez da gure bakea. Aho batez onartu zuen plenoak.
«Harritu nau prentsaurrean egin zenuten agerraldiak»
Galdera eta erreguen puntuan, Luis Intxauspe alkateak azaldu zuen, «harritu» egin zela, oposizioko hiru alderdiek prentsaurrean egin zuten agerraldiarekin: «harritu nau zuek esatea, prentsa bidez jakin zenutela Bruselasen nengoela. Europar Parlamentuan, ezkerreko taldeen kongresu bat izan zen; EH Bildu zegoen parte hartzaileen artean, eta talde horren partaide bezala joan nintzen. Gastu guztiak, gainera, parlamentuak ordaindu zituen», argitu zuen.
Andoni Amonarraiz EAJren bozeramaileak erantzun zion, galdetu beharko lukeena dela, «zergatik elkartzen den oposizioa ohar bat ateratzeko. Ez da izan kasu konkretu bategatik, baizik eta oposizioaren sentsazioa orokorra da. Bestalde, jakinda talde guztiok genuela interesa Uholdeen Batzordea sortzeko, horren berri ematea eskertuko genuen».
Esti Aldeiturriagak azaldu zuen, kirol taldeek eskatu zutela bilera hori, eta bertan adostu zela batzordea sortzea: «baina beste ezohiko batzorde bat deituko da, Udal talde guztiekin, Uholdeen Batzordearen sorrera formalizatzeko».