27 herri bisitatuko ditu 2016ko Laburbirak, Film Laburren Zirkuituak, eta Hernanin egingo du aurreneko geldialdia. Bihar izango da, iluntzeko 19:00etan Biterin. Dobera Euskara Elkarteak eta Topaguneak antolatu dute saioa.
13garren edizioa du Laburbirak, eta euskerazko zortzi film labur eskainiko dituzte oraingo honetan. Guztira, 76 minutuko iraupena izango du saioak.
Saioa ikusteko sarrerak, 2 euroan salgai
Zortzi filmak ikusteko sarrerak, momentuan bertan jarriko dituzte salgai: 2 euro izango dira, eta Dobera-Kronikako bazkideek debalde izango dute.
Hiru zatitan banatuko dute saioa: aurrenekoan, Laburbirako zortzi film laburrak jarriko dituzte; bigarrenean, Ane Urkiola Zea Bingo filmeko zuzendaria egongo da bertan, eta berarekin solasean aritzeko aukera izango dute bertaratuek. Eta bukatzeko, Doberak bere produktuak zozketatuko ditu ikusleen artean.
Filmak, oso anitzak
Emango dituzten filmak, oso anitzak izango dira, antolatzaileek aurreratu dutenez: «barrea, beldurra eta tximeletak piztuko zaizkizu sabelean».
Hauek dira jarriko diren filmen izenburuak: Zea Bingo, Erreplika, Jorrai, Fishura, Bere bizitzetako bat, Brunilda, Hartz txiki eta Semeak.